Sekretari amerikan i Shtetit Mike Pompeo u ka bërë thirrje iranianëve që të paraqesin video dhe materiale të tjera që dëshmojnë goditjen që ua bën qeveria protestuesve, duke u premtuar se Uashingtoni do të sanksionojë “abuzimet”.
“U kam kërkuar protestuesve iranianë të na dërgojnë videot, fotot dhe informacionin e tyre që dokumentojnë goditjen e regjimit ndaj protestuesve. SHBA-ja do të ekspozojë dhe sanksionojë abuzimet”, tha Pompeo.
Zyra e Komisionerit të Lartë të Kombeve të Bashkuara për të Drejtat e Njeriut përmendi raporte që sugjerojnë se “dhjetëra njerëz mund të jenë vrarë dhe shumë të tjerë të jenë plagosur”, përderisa Amnesty International tha se të paktën 106 protestues besohej se kishin vdekur.
Zyrtarët iranianë pranuan disa raste të vdekjeve, përfshirë anëtarët e forcave të sigurisë.
Protestat u nxitën nga një vendim i qeverisë, për të kufizuar blerjet e naftës dhe shkurtimin e subvencioneve. /tesheshi.com/
