Pentagoni ka publikuar strategjinë e re ushtarake amerikane, në të cilën si konkurrentë kryesorë janë etiketuar Kina, Rusia, Koreja e Veriut dhe Irani.
Kjo, sipas Reuters, është treguesi më i fundit i cili tregon se prioritetet e SHBA-së janë zhvendosur pas më shumë se 15 vjetësh, periudhë kjo gjatë së cilës SHBA ishte e përqendruar në luftën kundër terrorizmit.
Duke prezantuar strategjinë e re, ministri i Mbrojtjes James Mattis i quajti Kinën dhe Rusinë “forca revizioniste” të cilat “duan të krijojnë një botë në përputhje me modelet e tyre autoritare”.
“Ne do të vazhdojmë fushatën kundër terrorizmit në të cilën ne marrim pjesë sot, por një rivalitet më i madh i fuqive, jo terrorizmi, tani është fokusi kryesor i strategjisë kombëtare të SHBA”, tha Mattis në një fjalim në dokumentin e parë të vitit 2014.
Kina ishte e para që iu përgjigj komenteve të Mattis.
Zëdhënësja e ambasadës kineze në Shtetet e Bashkuara, tha se Pekini po kërkon një partneritet global, jo një dominim global.
Ministri i Jashtëm rus, Sergei Lavrov tha se strategjia e re e SHBA është konfrontuese.
Pentagoni ka publikuar një version të dokumentit prej 11 faqesh, që nuk specifikon se si do të duket kjo kthesë në drejtim të kundërshtimit të Kinës dhe Rusisë.
Ministria e Mbrojtjes së SHBA-së përfshin edhe Korenë e Veriut si një nga prioritetet, duke deklaruar se Shtetet e Bashkuara duhet që mbrojtjen raketore ta përqëndrojnë në kërcënimet e Phenianit me armë bërthamore, si dhe armë konvencionale. /tesheshi.com/
