Një tjetër mesazh përforcuar është përcjellë nga SHBA lidhur me figurën e Berishës dhe “non grata”-n ndaj tij.
Zv/Ndihmës Sekretari i shtetit Gabriel Escobar, në një intervistë për Grida Dumën në TCH, tha se ai i përket së shkuarës, apo se vula që i është vënë nga Departamenti i Shtetit, nuk do t’i hiqet, siç ai mund të shpresojë.
“Mendoj se pozicioni ynë për këtë individ të veçantë është shumë i qartë. Por unë do të thosha se nuk njoh asnjë person që përmes zgjedhjeve të ketë arritur të ndryshojë përcaktimin e pozicionit të tyre prej Departamentit të Shtetit sipas legjislacionit tonë. Po, thënë kjo, unë mendoj se Shqipëria ka një të ardhme vërtet të jashtëzakonshme dhe duhet të fokusohet tek e ardhmja. Dhe ka shumë njerëz që do të donin ta tërhiqnin atë në të shkuarën dhe unë nuk mendoj se ky është një vend ku Shqipëria dëshiron të shkojë”, tha Escobar mbi Berishën, duke mos preferuar t’ja artikulojë emrin.
“Pra, është e shkuara?”, e pyeti Duma.
“Nëse më pyet mua, patjetër, e shkuara”, u përgjigj diplomati amerikan, i cili këto ditë vizitoi Shqipërinë. /tesheshi.com/
