Kryetari i Bashkisë së New York-ut, Eric Adams shpalli gjendjen e jashtëzakonshme në zonën e qytetit për shkak të fluksit të mijëra emigrantëve të dërguar nga shtetet e Amerikës së Jugut që nga pranvera dhe tha se kërkon që qyteti t’u sigurojë atyre strehim dhe ndihmë ta tjera.
“Një qytet që po rimëkëmbet nga pandemia e vazhdueshme globale është mbingarkuar nga një krizë humanitare e krijuar nga duart e njeriut,” tha ai.
“Jemi në buzë të një gremine. Ne kemi nevojë për ndihmë, tani”, tha Adams.
Sipas tij, qyteti pritet të shpenzojë një miliardë dollarë deri në fund të vitit fiskal për të ndihmuar emigrantët që vijnë vrullshëm.
Shumë prej tyre varen nga ndihma e qeverisë sepse ligji federal i ndalon ata të punësohen në SHBA.
Administrata e New York-ut nuk ka specifikuar se cilat kosto janë përfshirë në këtë shumë.
Sistemi i strehimit në New York, nën presion
Adams, një demokrat, tha se ardhjet e reja të emigrantëve janë të mirëpritur, duke vënë në dukje me krenari historinë e New York-ut si një portë për migrantët e Botës së Vjetër për të hyrë në Amerikë.
“Njujorkezët janë kujdesur gjithmonë për vëllezërit dhe motrat tona emigrantë. Ne e shohim veten në to. Ne shohim paraardhësit tanë”, tha ai.
“Ndërsa dhembshuria jonë është e pakufishme, burimet tona nuk janë,” shtoi ai.
Sistemi i strehimoreve në NewYork është tashmë nën presion, dhe tani është edhe më shumë për shkak të një rritje të papritur të numrit të njerëzve që kërkojnë ndihmë gjatë vitit.
Pesë deri në gjashtë autobusë me emigrantë mbërrijnë në New York në ditë dhe nëntë mbërritën të enjten, tha Adams.
Presion mbi administratën Biden
Shumë prej këtyre autobusëve u morën me qira dhe u paguan nga zyrtarë republikanë nga Teksasi dhe Arizona, duke i bërë presion administratës së presidentit amerikan Joseph Biden për të ndryshuar politikat për emigrantët që hyjnë në SHBA përmes kufirit meksikan.
Presioni ushtrohet duke dërguar autobusë me emigrantë në qytetet e drejtuara nga Partia Demokratike dhe më tej në veri.
Një në pesë shtretër të pastrehë në qytetin e New York-ut tani është i zënë nga një emigrant.
Qyteti ka hapur 42 strehimore të reja të përkohshme, kryesisht në hotele, por Adams paralajmëron se duhet bërë më shumë.
Ai kërkoi ndihmë financiare shtetërore dhe federale dhe miratimin e një ligji federal që do t’i lejonte azilkërkuesit të merrnin leje pune më herët se tani. /tesheshi.com/
