Ambasada e SHBA-ve në Kosovë është shprehur e shqetësuar për ndryshimin e mandatit të FSK-në në ushtri pa amendament kushtetues, duke dalë kështu kundër iniciativës së ndërmarrë nga presidenti Thaçi.
Në një deklaratë për media, Ambasada e SHBA-ve thotë se e mbështesin transformimin gradual në përputhje me standardet e NATO-s, por ky pajtim duhet të bëhet në pajtim me Kushtetutën dhe përmes një procesi politik gjithëpërfshirës dhe përfaqësues që pasqyron demokracinë shumetnike të Kosovës.
“Ne jemi të gatshëm të angazhohemi në një proces këshillues me të gjithë hisedarët për ta arritur qëllimin tonë të përbashkët për transformimin e Forcës së Sigurisë së Kosovës në mënyrë të tillë që e rritë sigurinë e Kosovës, i kontribuon stabilitetit rajonal, dhe që përkrahë Kosovën në rrugën e saj drejt integrimit Euro-Atlantik. Miratimi i ligjit të propozuar tani do të na detyronte që ta rivlerësojmë bashkëpunimin tonë dypalësh me forcat e sigurisë të Kosovës si dhe ndihmën tonë afatgjatë për këto forca”, thuhet në deklaratë. /tesheshi.com/
