Sekretari amerikan i Shtetit Antony Blinken u takua me presidentin kinez Xi Jinping të hënën, duke i dhënë fund një vizite të profilit të lartë në Pekin që synonte të garantonte që mosmarrëveshjet e shumta të superfuqive të mos përshkallëzohen në konflikt.
Blinken u bë kështu Sekretari i parë i Shtetit që takohet me liderin kinez që nga viti 2018 dhe takimi është një gjest i veçantë dhe një shenjë se Pekini synon të ulë tensionet që janë rritur ndjeshëm mes dy fuqive kundërshtare, shkruan Reuters.
Xi tha se ishte “shumë mirë” që të dy palët “kishin bërë përparim dhe kishin arritur një marrëveshje për disa çështje specifike”, por nuk elaboroi se cilat ishin ato çështje.
Presidenti kinez tha se shpresonte se Blinken do të jepte një “kontribut më pozitiv” në stabilizimin e marrëdhënieve Kinë-SHBA.
“Ndërveprimet mes vendeve duhet të bazohen gjithmonë në respektin dhe ndershmërinë reciproke. Shpresoj që përmes kësaj vizite, zoti Sekretar, të jepni një kontribut më pozitiv në stabilizimin e marrëdhënieve Kinë-SHBA”, tha Xi.
Takimi, i cili erdhi në ditën e fundit të vizitës dy-ditore të Blinkenit në Kinë, gjithashtu, besohet, mund të ndihmojë në lehtësimin e një samiti midis Xi dhe Presidentit Biden më vonë gjatë vitit.
Bashkëpunim apo konflikt?
Më herët të hënën, Blinken zhvilloi gjithashtu bisedime të gjera me kryediplomatin kinez Wang Yi dhe një ditë më parë me ministrin e Jashtëm Qin Gang.
Wang i tha Blinkenit se Kina dhe SHBA duhet të zgjedhin midis “bashkëpunimit dhe konfliktit” dhe se vendi i tij nuk do të bëjë “asnjë kompromis” për Tajvanin.
“Duhet bërë një zgjedhje midis dialogut dhe konfliktit, bashkëpunimit dhe konfliktit,” i tha Wang Yi, kryediplomati i Partisë Komuniste Kineze (CCP), bashkëbiseduesit të tij, raportoi transmetuesi publik kinez CCTV.
“Ruajtja e unitetit kombëtar është gjithmonë në qendër të interesave thelbësore të Kinës” dhe “për këtë çështje, Kina nuk do të bëjë asnjë kompromis apo lëshim” në lidhje me Tajvanin, i tha gjithashtu Blinken Wang, zyrtari më i lartë në diplomacinë kineze.
Antony Blinken ndodhet në Kinë që nga e diela, që është vizita e parë e Sekretarit të Shtetit të SHBA në vend që nga viti 2018.
Kina e konsideron Tajvanin një nga provincat e saj, të cilën ende nuk e ka ribashkuar me sukses me pjesën tjetër të territorit të saj që nga fundi i Luftës Civile Kineze në 1949.
Përveç çështjes së mprehtë të lidhjeve midis Shteteve të Bashkuara dhe Tajvanit, një ishull i pretenduar nga Pekini dhe në qendër të konfliktit midis dy fuqive, marrëdhëniet dypalëshe mbeten të tensionuara për një sërë çështjesh.
Midis tyre janë rivaliteti në teknologji, sanksionet e SHBA kundër gjigantëve dixhitalë kinezë, tregtia, trajtimi i pakicës myslimane ujgure në Kinë apo pretendimet kineze në Detin e Kinës Jugore.
Biseda “të sinqerta dhe përmbajtësore”.
Zyrtari i lartë amerikan u prit të dielën nga ministri i Jashtëm kinez Qin Gang, i cili është një hap më poshtë Wang Yi në hierarkinë kineze.
Dy zyrtarët biseduan për shtatë orë e gjysmë, më shumë se sa pritej, dhe të dy vendet ranë dakord të ruanin komunikimin për të shmangur çdo konflikt, shkruan AFP.
Asnjëra palë nuk e konfirmoi takimin midis Blinken dhe Xi, takimi i të cilit me presidentin amerikan Joe Biden në Bali në nëntor ngriti shpresa të kujdesshme për një shkrirje të marrëdhënieve.
“Ti je miku i parë amerikan që kam takuar këtë vit”, i tha Xi, sipas agjencisë së lajmeve Xinhua. “Ne i kemi vendosur gjithmonë shpresat tona te populli amerikan dhe shpresojmë që miqësia mes dy popujve të vazhdojë”, tha Xi, duke kërkuar të dërgojë një mesazh pajtimi.
Të dy vendet njoftuan të dielën se Qin Gang kishte pranuar ofertën e Sekretarit të Shtetit të SHBA për të vizituar Shtetet e Bashkuara.
Bisedimet mes të dyve, të përfunduara në mbrëmje me një banket në kompleksin diplomatik Diaoyutai, ishin “të ndershme, thelbësore dhe konstruktive”, tha zëdhënësi i Departamentit të Shtetit, Matthew Miller.
Vizita e Antony Blinken është vizita e parë e një Sekretari Amerikan të Shtetit në Kinë që nga vizita e paraardhësit të tij Mike Pompeo në tetor 2018. /tesheshi.com/
