Duke vendosur të jetë pjesë e stërvitjes ushtarake “Platinum Wolf 23”, në të cilën do të marrin pjesë edhe pjesëtarë të forcave të armatosura të disa anëtarëve të NATO-s, Serbia ka bërë zgjedhjen që të jetë pjesë e Perëndimit, tha ambasada amerikane në Beograd.
“Serbia ka bërë një zgjedhje për të qenë pjesë e Perëndimit, dhe kjo përfshin integrimin e mëtejshëm me strukturat e sigurisë euroatlantike dhe ushtritë partnere”, tha zëdhënësi i Ambasadës së SHBA-së në Radion Evropa e Lirë (RSE), transmeton Beta.
Ambasada tha gjithashtu se “integrimi më i madh i Serbisë në strukturat e sigurisë euroatlantike” do të shkurtojë rrugën e Serbisë “për anëtarësimin përfundimtar në Bashkimin Evropian”.
Ministria e Mbrojtjes e Serbisë ka konfirmuar për RSE se “po ndërmerr të gjitha aktivitetet e nevojshme për përgatitjen dhe realizimin e stërvitjes ndërkombëtare” që do të mbahet në jug të Serbisë nga 14 deri më 30 qershor.
Autoritetet serbe bënë një përjashtim
SHBA do të marrë pjesë në stërvitjen ushtarake “Platinum Wolf 23” me 100 ushtarë, tha ambasada e SHBA në Beograd.
Zëdhënësi i ambasadës deklaroi se kjo stërvitje “është drejtpërdrejt e rëndësishme për pjesëmarrjen ekzistuese të Serbisë në misionet në mbarë botën”.
“Dhe sa më shumë të praktikojmë së bashku, aq më efektivë do të jemi në arritjen e qëllimit të përbashkët, paqen dhe stabilitetin rajonal, dhe ruajtjen e Evropës në tërësi, të lirë dhe në paqe”, shtoi ai.
Me vendosjen e mbajtjes së stërvitjes “Platinum Wolf 23”, autoritetet serbe bënë përjashtim nga moratoriumi për mbajtjen e stërvitjeve ushtarake me partnerë të huaj, si nga Lindja ashtu edhe nga Perëndimi, i cili është në fuqi që nga shkurti i vitit 2022, që nga fillimi i pushtimi rus i Ukrainës.
Kremlini: Stërvitja “nuk do të kalojë pa u vënë re” në Rusi
Ndërsa SHBA përshëndeti vendimin e Serbisë, Kremlini njoftoi se stërvitja “nuk do të kalojë pa u vënë re” në Rusi.
“Sa i përket stërvitjeve, ne sigurisht që do t’i monitorojmë me shumë kujdes,” tha zëdhënësi i Kremlinit Dmitry Peskov më 6 prill.
Dy muaj më parë, lëvizja e djathtë serbe Dveri bëri thirrje për anulimin e stërvitjes, por ministri serb i Mbrojtjes Millosh Vuçeviç e hodhi poshtë këtë kërkesë, duke thënë se stërvitja “nuk përfaqëson një precedent, por një vazhdimësi të bashkëpunimit ndërkombëtar nga i cili përfitonin serbët, ushtria e saj dhe që kontribuon në përmirësimin e aftësisë së saj operacionale”.
Stërvitja taktike “Platinum Wolf 23” do të mbahet në bazën ushtarake afër Bujanocit me pjesëmarrjen e ushtrive të Serbisë, SHBA-së dhe 10 vendeve tjera partnere.
Stërvitja “Ujku i Platinit” është zhvilluar shtatë herë në territorin e Serbisë që nga viti 2014.
Qëllimi i stërvitjes është ruajtja e nivelit të arritur të ndërveprimit të njësive të Forcave të Armatosura të Serbisë për pjesëmarrje në operacione shumëkombëshe. /tesheshi.com/
