Administrata e re amerikane ka përdorur për herë të parë një ton më të matur karshi Izraelit, përkundër daljes së plotë në krah, duke theksuar një ditë më parë se ndërtimi i ngulimeve të reja izraelite dhe zgjerimi i ekzistueseve mund të mos ndihmojë në arritjen e paqes me palestinezët.
“Ndërkohë që nuk besojmë se ekzistenca e ngulimeve është pengesë për paqen, ndërtimi i ngulimeve të reja apo zgjerimi i ngulimeve ekzistuese përtej kufijve të tyre të tanishëm mund të mos jetë ndihmues në arritjen e këtij objektivi,” ka deklaruar Sean Spicer, zëdhënësi i Shtëpisë së Bardhë.
Planet izraelite kanë marrë hov që prej hyrjes së Trump-it në zyrën ovale; vetëm së fundi Izraeli bëri të ditura planet për ndërtimin e 3.000 njësive të reja të banimit për kolonët izraelitë në Bregun Perëndimor, një territor i pushtuar. Ngulimet në Jerusalemin Lindor dhe në Bregun Perëndimor çmohen si të paligjshme, në shkelje të ligjit ndërkombëtar.
“Administrata e Trump-it nuk ka marrë një qëndrim zyrtar mbi aktivitetin e ngulimeve, dhe shpreson në vazhdimin e diskutimeve, përfshirë me kryeministrin Netanyahu kur ai të vizitojë presidentin Trump gjatë këtij muaji,” do të shtonte Spicer.
Netanyahu pritet ta vizitojë Shtëpinë e Bardhë më 15 shkurt, me perspektivën e një marrëdhënie shumë më të ngrohtë me Trump-in nga ç’ishte ajo me Barack Obama-n.
Donald Trump ka premtuar më herët që ta zhvendosë ambasadën amerikane në Izrael nga Tel-Avivi në Jerusalem; një premtim që ka ngjallur ankth e që është dënuar, posaçërisht nga palestinezët. /tesheshi.com/
