Një mur i premtuar nga Donald Trump në kufirin mes SHBA-së dhe Meksikës mund t’i ndajë këto dy vende fizikisht, por asgjë nuk i pengon ato të bashkohen, e së bashku me Kanadanë të kërkojnë organizimin e Kupës së Botës së 2026-s.
Tre vendet kanë deklaruar se po hartojnë një kërkesë të përbashkët për organizimin e aktivitetit më të madh futbollistik botëror të pas nëntë viteve.
E nëse ndodh që kërkesa e tyre të marrë përgjigje pozitive, çka ka shumë të ngjarë që të jetë e tillë për një sërë arsyesh, për herë të parë do të ketë një botëror të organizuar nga tre shtete së bashku.
Drejtuesi i federatës amerikane të futbollit, teksa e bëri të njohur iniciativën të hënën në Nju-Jork së bashku me dy homologët e tij, theksoi se të tre palët kishin mbështetjen e presidentit amerikan.
“Ne shpallim kërkesën tonë për ta kthyer Kupën e Botës në SHBA, në Kanada dhe në Meksikë, në vitin 2026,” deklaroi Sunil Gulati ditën e djeshme.
Botërori i pas një viti do të jetë në Rusi, ai i 2022-shit në Katar, ndërsa procesi i përzgjedhjes së organizatorëve të aktivitetit pasardhës pritet të zgjasë gjer në 2020-n.
Shtetet e Bashkuara të Amerikës qenë pritëse të Kupës së Botës së vitit 1994, Meksika e ka organizuar dy herë këtë veprimtari, në 1970-n dhe në 1986-n, kurse Kanadaja nuık ka provuar më herët të ndërmarrë një nismë të tillë. /tesheshi.com/
