Administrata e presidentit amerikan Joe Biden ka vendosur të ndalojë 130 milionë dollarë ndihmë ushtarake për Egjiptin, për shkak të dështimit të vendit për të mbrojtur të drejtat e njeriut, kanë konfirmuar zyrtarët amerikanë.
Autoritetet në Kajro do të marrin ende një pjesë të caktuar të paketës së ndihmës amerikane, për shkak të reduktimit të numrit të të burgosurve politikë.
Sekretari amerikan i Shtetit, Antony Blinken, konfirmoi se Egjipti ka bërë disa përparime në lidhje me liritë politike duke liruar së fundmi qindra njerëz.
Pjesa e djathtë e Kongresit dhe votuesit e tyre kërkojnë që vendit afrikan t’i mohohet shuma prej 300 milionë dollarësh që ishte rënë dakord me kushtet e organit përfaqësues amerikan.
Kundërshtarët e ndihmës për Egjiptin tregojnë për raste të shumta të shkeljeve të të drejtave të njeriut në të gjithë vendin nën sundimin e presidentit Abdel Fattah el-Sisi, të cilat përfshijnë tortura dhe zhdukje.
Shuma që Blinken vendosi të mbajë në burim është 10 për qind e 1.3 miliardë dollarëve që ndahen çdo vit për vendin në Afrikën verilindore.
Uashingtoni do të dërgojë ende 75 milionë dollarë në Egjipt, falë progresit pozitiv në uljen e numrit të të burgosurve politikë, që është 500 më pak këtë vit se të liruarit nga burgu.
Gjithashtu, Kajro do të marrë edhe 95 milionë dollarë të tjera të destinuara për luftën kundër terrorizmit dhe forcimin e sigurisë kufitare, duke qenë se ndihmat në zonat e përmendura nuk kushtëzohen nga vlerësimi i gjendjes së të drejtave të njeriut. /tesheshi.com/
