SHBA-ja ka informuar aleatët e saj se nuk planifikon të marrë pjesë në stërvitjet ushtarake në Evropë, përveç atyre të planifikuara tashmë për vitin 2025.
Informacioni u raportua fillimisht nga Expressen suedez, burimet e së cilës thonë se vendimi i SHBA-së do të prekë disa stërvitje që aktualisht janë në fazën e planifikimit dhe që supozohej të zhvilloheshin në Suedi. Kjo do të thotë se vendet e NATO-s do të detyrohen të planifikojnë stërvitje pa pjesëmarrjen e ushtrisë amerikane, e cila është më e madhja në Aleancë, raporton Kyiv Independent.
Presidenti i SHBA-së, Donald Trump ka kritikuar vazhdimisht vendet e NATO-s për dështimin e arritjes së qëllimit për të shpenzuar dy për qind të PBB-së për mbrojtje, duke shpjeguar se diferenca rëndon padrejtësisht SHBA-në.
Të premten, ai paralajmëroi se mund të mos mbrojë aleatët e NATO-s që nuk arrijnë të përmbushin objektivat e tyre të shpenzimeve.
“Kur erdha në takimin e parë të NATO-s, vura re se njerëzit nuk po i paguanin faturat fare. Mendova se duhet të prisja deri në takimin e dytë, gjë që e bëra. Pastaj u thashë: ‘Nëse nuk i paguani faturat, ne nuk do të marrim pjesë, nuk do t’ju mbrojmë’. Kur e thashë këtë, ishte e pabesueshme se si u shfaqën paratë, tani i kanë, por nuk mjaftojnë, duhet të paguajnë më shumë”, tha Trump.
Gjithashtu u njoftua se administrata Trump po riformulon angazhimin e NATO-s në një mënyrë që favorizon vendet anëtare me shpenzime më të larta të mbrojtjes, me shpjegimin se presidenti “po konsideron t’i japë përparësi atyre”.
Raportohet se Trump po shqyrton tërheqjen e trupave amerikane nga Gjermania dhe ridislokimin e tyre në Evropën Lindore. Supozohet se ai synon të tërheqë rreth 35 mijë prej tyre dhe t’i transferojë në Hungari. /tesheshi.com/
