Gjatë diskutimit në seancën e Këshillit të Sigurimit të Kombeve të Bashkuara, ku u shqyrtua raporti gjashtëmujor i Sekretarit të Përgjithshëm të OKB-së Antonio Guterres për punën e Misionit të OKB-së në Kosovë (UNMIK), të gjithë përfaqësuesit e fuqive perëndimore e dënuan sulmin ndaj Policisë së Kosovës në Banjska, duke bërë thirrje për ndjekjen penale të përgjegjësve.
Përgjegjësinë për sulmin e mori Milan Radoiçiç, nënkryetari i atëhershëm i Listës Serbe, duke mohuar se kishte marrë udhëzime nga Serbia, siç akuzojnë liderët e Kosovës.
Përfaqësuesi i SHBA-së në Këshillin e Sigurimit të OKB-së tha se Uashingtoni “dënon fuqishëm dhunën e sulmuesve të armatosur” ndaj policisë së Kosovës në fshatin Banjskë, e cila çoi në vdekjen e policit Afrim Bunjaku.
“Ai sulm ka qenë kërcënim i drejtpërdrejtë për qytetarët e Kosovës dhe ka rrezikuar personelin e NATO-s dhe të Bashkimit Evropian. Përgjegjësia e plotë e autorëve të sulmeve është e nevojshme. Individët që kanë ikur në vendet e treta duhet të ekstradohen ose të ndiqen penalisht.”
Ai tha se SHBA-të po paralajmërojnë të dyja palët që të mos ndërmarrin “lëvizje përshkallëzuese” dhe të angazhohen për dialog, duke theksuar se është e rëndësishme të bëhet përparim në zbatimin e të gjitha detyrimeve nga dialogu i Brukselit.
Diplomati amerikan deklaroi se UNMIK-u e ka “përmbushur” mandatin e tij shumë kohë më parë dhe se SHBA-të i kanë bërë thirrje Këshillit të Sigurimit të OKB-së që të marrë vendim për përfundimin e këtij misioni.
Përfaqësuesit e Britanisë së Madhe dhe Francës thanë se Londra dhe Parisi janë të shqetësuar për sfidat e sigurisë në veri të Kosovës, duke bërë thirrje për dialog, duke përfshirë një marrëveshje për formimin e një komuniteti të komunave me shumicë serbe në veri të Kosovës. /tesheshi.com/
