Dhoma e Përfaqësuesve të SHBA-së votoi me shumicë dërrmuese në favor të një rezolute që njeh vrasjet masive të armenëve një shekull më parë si gjenocid. Ndonëse konsiderohet si një votim simbolik por historik, rezoluta me gjasa të ndezë tensione të reja me Turqinë.
Dhoma e Përfaqësuesve, e kontrolluar nga Demokratët, votoi 405-11 në favor të rezolutës, e cila pohon se është politikë e SHBA-ve për të njohur si gjenocid vrasjen e 1.5 milion armenëve në fundin e Perandorisë Osmane, nga viti 1915 deri në 1923.
Votimi shënoi një unanimitet të paparë në 35 vjet, duke përkrahur këtë legjislacion si nga demokratët ashtu edhe nga republikanët e Presidentit Donald Trump.
Menjëherë pas votimit, ligjvënësit i bënë thirrje z. Trump të vendosë sanksione ndaj Turqisë për ofensivën e saj në veri të Sirisë.
Në një deklaratë, Ministria e Jashtme e Turqisë tha se masa nuk ishte e përshtatshme për marrëveshjen e armëpushimit të 17 tetorit të rënë dakord midis Ankarasë dhe Uashingtonit. Ajo i bëri thirrje administratës amerikane të marrë masa për të shmangur hapat që do të dëmtojnë më tej lidhjet bilaterale.
Perandoria Osmane kishte si qendër Turqinë e sotme. Turqia pranon që shumë armenë që jetonin në Perandorinë Osmane u vranë në përleshje me forcat osmane gjatë Luftës së Parë Botërore, por kundërshton shifrat dhe mohon se vrasjet ishin orkestruar në mënyrë sistematike duke synuar një gjenocid. /tesheshi.com/
