Kreu demokrat Basha pati një takim me ambasadoren amerikane Yuri Kim, e kjo në kulmin e një krize, sërish me Metën në qendër, gjë që e ka detyruar gruan e Uashingtonit që të jetë shumë aktive këto dite, duke lëshuar dhe paralajmërime të forta me theks diplomatik, sidomos në mbrojtje të ecurisë së Reformës në Drejtësi.
Dhe ajo çfarë doli nga takimi Basha-Kim, qe një amnisti që kjo e fundit dha ndaj udhëhqësit të opozitës, i cili, në kundërshtim të hapur me këshillat, sugjerimet, deri dhe urdhërat e Perëndimit, dogji mandatet dhe bojkotoi zgjedhjet lokale të 30 qershorit. Tashmë është pa asnjë pushtet, jashtë sistemit dhe me një faktor ndërkombëtar armiqësor ndaj gjithë aksionit të tij politik kontravers.
“Diskutimi ynë ishte i fokusuar për të ardhmen dhe jo për të shkuarën. Dhe veçanërisht folëm si udhëheqësit shqiptarë duhet të përmbushin pritjet e popullit shqiptar sikurse kanë premtuar për të përfunduar reformën zgjedhore deri në 31 maj”, ishte deklarata e ambasadores Kim, e cila vijoi me tej duke thënë:
“Ky nuk është afat kohor që e ka vendosur ambasada e SHBA apo ndonjë faktor tjetër i jashtëm, por një afat që e kanë vendosur vetë udhëheqësit mbi veten e tyre. Nga përkufizimi opozita ka një punë shumë të vështirë përpara tyre, por ndihem e inkurajuar nga diskutimi këtë pasdite dhe pres me kënaqësi rezultatet”.
E kjo kërkesë e Kim, ndeshi në gatitu-në e Bashës, i cili tha: “Do të bëjmë gjithçka që brenda 31 majit, një afat që ne ia kemi kërkuar dhe vendosur kësaj shumice, që reforma të ketë përfunduar dhe të garantojmë vullnetin politik për të zbatuar ligjin, që është problemi numër një në Shqipëri”. /tesheshi.com/
