Nga Saimir Sulaj, Washington
Fëmijët e emigrantëve që kanë ardhur minorenë në SHBA dhe që kanë përfituar një leje qëndrimi të përkohshëm mund ta bëjnë gjumin të qetë. Së paku për këto ditë. Ndryshe nga sa u paralajmërua javën që shkoi, Presidenti amerikan Trump duket se do ta ruajë të ashtëquajturin ligji “DACA”, që i lejon fëmijët e emigrantëve të kenë qëndrim të rregullt në SHBA, të punojnë dhe të udhëtojnë jashtë SHBA-së e të kthehen sërish.
Presidenti i SHBA-së në një lëvizje të beftë, duket se ka pranuar të mbajë në fuqi ligjin e paraardhësit të tij Barack Obama dhe duket se është tërhequr edhe nga ideja e ndërtimit të një muri të madh në kufi në Meksikën, për të parandaluar emigracionin e paligjshëm që vjen nga kufijtë jugore. Ai priti në një darkë pune në Shtëpinë e Bardhë, këtu në Washington, D. C. liderët demokratë të Kongresit, atë të Senatit Chuck Schumer dhe atë të Dhomës së Përfaqësuesve, ish-kryetaren e kësaj Dhome, Nancy Pelosi. Këta të fundit, menjëherë pas kësaj darke, u shprehën se Presidenti Donald Trump ka rënë dakord që të rregullojë çështjen e ligjit “DACA” dhe të punojë për shpalosjen e një plani për sigurinë e kufijve, duke përjashtuar një mur në kufirin amerikano-meksikan, që ishte një nga premtimet thelbësore të fushatës së Trump. Në një deklaratë për mediat, Schumer dhe Pelosi thanë se partitë u morën vesh që ta ruajnë ligjin “DACA” dhe të punojnë për hartimin e një pakete ligjore për sigurinë e kufijve, që të jetë i pranueshëm për të dyja palët, si demokratët, ashtu edhe republikanët.
Megjithë optimizmin dhe deklaratat e krerëve demokratë të Kongresit, Shtëpia e Bardhë është shprehur më e përmbajtur. Sekretarja për mediat e zotit Trump, Sarah Sanders, reagoi menjëherë, duke lënë të kuptohej për një tërheqje sa i takon çështjes së murit. “Edhe pse DACA dhe çështja e sigurisë së kufijve ishin pjesë e diskutimeve, përjashtimi i ndërtimit të murit nuk është një çështje për të cilën është rënë dakord”, – tha Sanders.
Ndërsa drejtori për Çështjet Ligjore në Shtëpinë e Bardhë, Marc Short konfirmoi se Presidenti Trump dhe demokratët ranë dakord për të punuar për një rrugë ligjore për çështjen “DACA”, por ai i cilësoi pretendimet e demokratëve për një marrëveshje që përjashton murin me Meksikën, si një çorientim të qëllimshëm.
Nisma e ish-Presidentit amerikan Barack Obama për legalizimin e fëmijëve të emigrantëve pati bujë të madhe disa vjet më parë. Nga ky ligj përfitojnë miliona fëmijë të emigrantëve, mes të cilëve edhe shumë emigrantë shqiptarë. Përllogaritet se së paku 11 milionë emigrantë gjenden në SHBA në mënyrë të paligjshme. Në SHBA ka përplasje të shumta në lidhje me këtë çështje. Konservatorët i qëndrojnë fort mendimit se ata duhet të depërtohen në vendet e origjjinës. Ndërsa liberalët ngulmojnë se ata duhet të legalizohet dhe të punojnë rregullisht, duke kontribuar edhe në ekonominë e vendit përmes shlyerjes së taksave. Emëruesi i përbashkët i dy kaheve politikë, është siguria e kufijve, në mënyrë që të reduktohet në maksimum numri i emigrantëve që hyjnë në mënyrë të paligjshme në SHBA. Ajo që i ndan, mbetet ende çështja e murit. /tesheshi.com/
