Dy nga tre myslimanë në Shtetet e Bashkuara janë ekspozuar ndaj sjelljeve islamofobike të paktën një herë në jetën e tyre, sipas sondazheve të kryera në atë vend.
Në një sondazh të kryer në Universitetin e Kalifornisë, Instituti Berkeley, 67.5 përqind e të anketuarve muslimanë thanë se kishin përjetuar islamofobinë të paktën një herë në jetën e tyre.
Sondazhi zbuloi se në mesin e popullatës muslimane femra, kjo normë rritet në 76.7 përqind.
Të paktën 33 përqind e pjesëmarrësve thanë se zgjodhën të fshehin identitetin e tyre fetar në një moment në mënyrë që të mos ekspozoheshin ndaj islamofobisë, ndërsa 88.2 përqind thanë se shmangnin fjalime dhe veprime të caktuara nga frika se mos përballeshin me reagime.
Fshehja e identitetit fetar
Eshtë vërejtur se përqindja e njerëzve që përpiqen të fshehin identitetin e tyre fetar është veçanërisht e theksuar në mesin e grupmoshës 18-29 vjeç, me përqindjen që lëviz rreth 45 përqind.
“Ky studim tregon se një musliman, edhe nëse nuk përballet drejtpërdrejt me sjelljen islamofobike, është i ekspozuar ndaj një atmosfere në të cilën islamofobia në mediat dhe kulturën tonë pas 11 shtatorit u jep muslimanëve një ndjenjë të vëzhgimit, gjykimit ose përjashtimit,” tha Instituti.
Gjithsej 73 përqind e muslimanëve të anketuar thanë se mbajnë marrëdhënie të përditshme me jomyslimanët pavarësisht qasjeve islamofobike në shoqëri, dhe 93.7 përqind thanë se e konsiderojnë të rëndësishme pranimin e fëmijëve të tyre si amerikanë.
Studimi përfshiu 1,123 myslimanë të të gjitha grupeve dhe moshave që jetojnë në Shtetet e Bashkuara, gjysma e të cilëve janë gra.
Eshtë vlerësuar se rreth 3.5 milionë muslimanë jetojnë në Shtetet e Bashkuara. /tesheshi.com/
