Ambasadori amerikan në Tiranë, Donald Lu dhe ajo e BE-së në Tiranë, Romana Vlahutin kanë dhënë qëndrimin e tyre për gjysmë tonin e kokainës së kapur në Maminas.
Në një deklaratë për mediat, Lu dhe Vlahutin kanë përshëndetur operacionin e policisë, por nga ana tjetër kanë lëshuar alarmin e një përkeqësimi cilësor të trafikantëve shqiptarë.
Deklarata e SHBA
“Ambasada e Shteteve të Bashkuara dhe Administrata Anti-Drogë e Shteteve të Bashkuara (DEA) përgëzojnë Policinë Shqiptare të Shtetit për kapjen e 614 kilogramë kokainë kolumbiane dje në Durrës.
Kjo është sasia më e madhe e kokainës apo heroinës që është kapur prej vitesh.
Është një tregues pozitiv i vigjilencës së policisë, por edhe një shenjë shqetësuese se trafikimi i kokainës dhe drogave të tjera është në rritje.
Shtetet e Bashkuara do të vazhdojnë të ndihmojnë dhe mbështesin përpjekjet në zbatimin e ligjit për të parandaluar trafikimin e drogave në Shqipëri dhe për të arrestuar personat përgjegjës”.
Deklarata e BE
“Delegacioni i Bashkimit Europian përgëzon doganën dhe policinë për operacionin e suksesshëm në kapjen e 614 kg kokainë në portin e Durrësit.
Ju lumtë dhe vazhdoni kështu me luftën kundër krimit të organizuar.
Krimi i organizuar nuk mund të fitojë mbi forcën e ligjit. Shteti shqiptar duhet të jetë vigjilent dhe i fortë kundër grupeve të krimit të organizuar, të cilat përpiqen të zgjerojnë trafikun e drogës”. /tesheshi.com/
