Në deklaratën e përbashkët në përfundim të samitit Bashkimi Evropian – Shtetet e Bashkuara të Amerikës të mbajtur të premten në Uashington, u konfirmua përkushtimi i përbashkët për stabilitetin në Ballkanin Perëndimor dhe mbështetjen për perspektivën evropiane të rajonit.
“Të gjithë partnerët duhet të vazhdojnë me reformat që janë të nevojshme për të përparuar në rrugën e tyre evropiane”, thuhet në dokumentin përfundimtar, të publikuar në fund të takimit mes liderëve të BE-së dhe presidentit amerikan Joe Biden.
Një paragraf i veçantë në deklaratën e përbashkët i referohet procesit të normalizimit të marrëdhënieve ndërmjet Serbisë dhe Kosovës.
“Ne theksojmë nevojën që Kosova dhe Serbia të deeskalojnë urgjentisht tensionet dhe të zbatojnë shpejt dhe pa kushte marrëveshjen në rrugën e normalizimit të marrëdhënieve dhe kthimit në dialog me mbështetjen e BE-së”, thuhet në deklaratë.
Biden u takua me liderët evropianë Charles Michel dhe Ursula von der Leyen dhe fokusi i bisedimeve të tyre ishin luftërat midis Izraelit dhe Hamasit dhe Ukrainës dhe Rusisë.
Biden vuri në dukje se BE dhe SHBA mbështesin së bashku Izraelin dhe Ukrainën.
Von der Leyen tha një ditë më parë se ekzistonte një rrezik real i një konflikti më të gjerë rajonal për shkak të luftës midis Izraelit dhe Hamasit.
“Ne kemi parë që rrugët arabe janë plot zemërim në të gjithë rajonin. Prandaj rreziku i përhapjes rajonale është real”, vlerësoi ajo.
Von der Leyen e përshkroi Iranin si një “patron të Hamasit” dhe tha se “ata duan vetëm të ndezin flakët e kaosit”, ndërsa Rusia, “klienti i luftës i Iranit”, po e shikon nga afër.
Sipas saj, “Rusia dhe Hamasi janë të ngjashëm”.
Ky është samiti i dytë SHBA-BE që kur Biden mori detyrën.
Nën paraardhësin e tij, Donald Trump, marrëdhëniet mes aleatëve jashtë shtetit ishin të ftohta. /tesheshi.com/
