SPAK dhe përgjithësisht Reforma në Drejtësi kanë marrë një tjetër mbështetje të fortë amerikano-europiane në 24 orët e fundit.
Mbrëmjen e së mërkurës ishte ambasadorja Yuri Kim ajo që u takua me kreun e SPAK-ut Arben Kraja dhe shkroi: “Takim i mirë sot me kreun e SPAK-ut, Kraja Arben. SPAK ka bërë goditje kundër krimit të organizuar dhe korrupsionit: 588 çështje të ndjekura penalisht; 70 milion euro asete të konfiskuara; U hetuan 748 persona, nga të cilët 288 të arrestuar dhe 114 të dënuar deri më tani. Reforma në Drejtësi po jep rezultate”.
Më pas, këtë të enjte, është kolegu europian i Kim, ambasadori Soreca, i cili bën pothuajse të njëjtën gjë.
“U takova sot me Shefin e SPAK, Arben Krajën dhe drejtoreshën e FBI, Aida Hajnaj, ku diskutuam për arritjet e deritanishme të SPAK dhe procesin transparent të rekrutimit për hetuesit e FBI. Është e rëndësishme të vazhdohet me të njëjtën intensitet dhe angazhim, duke pasur parasysh pritjet e mëdha në SPAK, si dhe për të vazhduar dhënien e rezultateve.
Unë theksova rëndësinë e ecjes përpara me trajnimin dhe emërimin e shpejtë të hetuesve. Gjithashtu ritheksova se BE është e gatshme të vazhdojë ofrimin e mbështetjes dhe ndihmës së plotë për SPAK si një nga elementët kryesorë të Reformës në Drejtësi” shkruan ai.
Ky akt i koordinuar SHBA-BE në mbështetje të SPAK dhe Reformës në Drejtësi vjen në një kohë të shtimit të retorikës kundër tyre, sidomos nga presidenti Meta. /tesheshi.com/
