SHBA kundërshton kategorikisht mundësinë e kthimit të forcave serbe në territorin e Kosovës. Këtë e bëri të qartë Gabriel Escobar, Zëvendës Ndihmës Sekretari në Byronë e Çështjeve Evropiane dhe Euroaziatike të Departamentit të Shtetit, njëherësh dhe i Dërguari amerikan në rajon.
Mesazhi “bombardues” i një ëndrre serbe, tentuar për t’u bërë realitet, u dha nga Prishtina.
I pyetur për të komentuar deklaratën e presidentit të Serbisë, Aleksandar Vuçiç, i cili njoftoi se më 15 dhjetor Beogradi do t’i kërkojë KFOR-it të kthejë forcat në Kosovë, Escobar u përgjigj:
“Ne e kundërshtojmë kategorikisht, e refuzojmë kategorikisht, nuk e mbështesim fare. Po ashtu dua të them se Kosova ka garanci shumë të forta të sigurisë nga SHBA-ja”, tha Escobar.
I pyetur se cili do të ishte reagimi i SHBA-së nëse diçka e tillë do të ndodhte, Escobar nënvizoi:
“Së pari, nuk e pres diçka të tillë. Por së dyti, Kosova ka garanci të forta nga SHBA-të e manifestuara përmes pjesëmarrjes në KFOR”. /tesheshi.com/
