Shtetet e Bashkuara të Amerikës besojnë se Hamza bin Laden, djali i udhëheqësit të vrarë të al Qaeda-s, Osama bin Laden, ka vdekur.
Një zyrtar amerikan, i cili foli në kushte anonimiteti, nuk dha detaje të mëtejshme lidhur me vdekjen e tij, por thotë se bazohet në burime të mirinformuara.
Presidenti Donald Trump nuk pranoi të komentoj raportet e tilla, njësoj si Shtëpia e Bardhë që iu shmang kësaj teme.
Hamza, që besohet të jetë rreth 30 vjeç, qëndronte pranë të atit në Afganistan para 11 Shtatorit 2001, dhe kaloi në Pakistan pas pushtimit amerikan atje.
Osama bin Laden u vra nga forcat speciale amerikane që bastisën kompleksin e tij në Pakistan në 2011-tën. Hamza mendohej se ishte në Iran në atë kohë, dhe dokumentet e marra nga kompleksi tregonin se ndihmësit ishin përpjekur ta ribashkonin atë me babanë e tij. /tesheshi.com/
