Zyra e Bashkimit Europian që ka përfunduar të gjithë hetimin për zyrtarët e korruptuar shqiptarë që kanë fshehur pasurinë e tyre në banka të huaja, shoqëri offshore apo biznese të mëdha në vend, është alarmuar nga një veprim i Kryeprokurorit Adriatik Llalla.
Ky i fundit, edhe pse në fundin e mandatit të tij po tenton të sekuestrojë të gjitha serverat ku ndodhen pasuritë e gjyqtarëve prokurorëve dhe zyrtarëve të tjerë, që administrohen nga ILDKP-KI. Ky institucion në mënyrë të fshehtë ka arritur të gjejë paratë e fshehura të zyrtarëve të korruptuar dhe i ka bërë gati gjithçka për prokurorinë Speciale SPAK menjëherë pas zbatimit të vettingut.
Tashmë ka dalë sheshit ajo që tesheshi.com e ka bërë publike tre muaj më parë.
Prokuroria e Përgjithshme bëri menjëherë rekurs vendimin e gjykatës, që nuk i dha të drejtë asaj për të sekuestruar të dhënat e serverave të Inspektorit të Lartë të Deklarimit dhe Kontrollit të Pasurive.
Gjykata e Shkallës së Parë në Tiranë dhe ajo e Apelit e kishin rrëzuar kërkesën e Prokurorisë së Përgjithshme, e cila ngulmon në dhënien e së drejtës për të pasur në dorë serverin, ku ndodhen vetë-deklarimet dhe verifikimet e pasurisë së të gjithë politikanëve dhe zyrtarëve të lartë ndër vite.
Prokuroria e Përgjithshme nisi hetime kryesisht ndaj inspektorit të Lartë të Deklarimit dhe Kontrollit të Pasurive dhe kryeinspektorit Shkëlqim Ganaj. Zyrtarisht, sipas prokurorisë, për një periudhë trevjeçare si titullar i institucionit, ai nuk ka denoncuar asnjë rast të konfliktit të interesit të zyrtarëve të lartë, edhe pse raste të tilla dyshohet se ka pasur.
Pas nisjes së hetimeve, Prokuroria sekuestroi një sërë dokumentesh nga ILDKPKI, si dhe të dhëna të ruajtura në serverin qendror. Por këto veprime të Prokurorisë, për efekt të hetimit, janë cilësuar të paligjshme nga gjykatat e Shkallës së Parë dhe Apelit, të cilat pas ankimit të bërë nga Inspektoriati, kanë refuzuar të gjitha vendimet e sekuestrove të dokumentacionit dhe të të dhënave të serverit qendror të ILDKPKI-së, të cilët në total janë 6 të tillë.
Port ë gjitha këto dokumente, janë vetëm maja e ajsbergut, pasi lojë po bëhet për letrat e reja të ardhura nga Interpol dhe organet gjermane të hetimit, të cilët kanë gjurmuar kudo në lidhje me këto pasuri.
Çështja e sekuestrimit të serverit të ILDKPKI-së po merr vëmendje ndërkombëtare dhe të shërbimeve sekrete.
Burime diplomatike pohuan se po ndjekin me vëmendje të shtuar dhe shqetësim këtë proces gjyqësor, i cili me gjasë mund të ketë ndikim të pakthyeshëm në procesin e Reformës në Drejtësi dhe veçanti “vetting”-un.
Këto burime të huaja u shprehën me shqetësim në kushte anonimiteti, se ILDKPKI-ja dhe të dhënat e tij do të jenë një bazë e rëndësishme për hetimin që do të kryhet në bazë të ligjit të “vetting”-ut për të gjithë sistemin e drejtësisë, por edhe një bazë për SPAK-un, njësinë e posaçme antikorrupsion që pritet të nisë punë shumë shpejt.
Si e tillë, ajo është kthyer në vëmendjen e trupës së gjyqtarëve dhe prokurorëve, të cilët sipas të njëjtit burim të huaj diplomatik shohin me shqetësim këtë veprimtari, që mund të rrezikojë karrierën, por jo vetëm, të tyren dhe të politikanëve aktivë në vend.
Sipas të njëjtit burim, nëse çështja shkon në duar të gabuara në Gjykatën e Lartë dhe segmenteve të interesuara për këtë çështje në prokurori, frika është te manipulimet e mundshme të dëshmive që mund të shërbejnë si prova në të ardhmen, për procese të rëndësishme kundër korrupsionit.
Nëse kjo ndodh, do të bënte nul thelbin e Reformës në Drejtësi, edhe nëse të enjten ligji i “vetting”-ut kalon klasën në Gjykatën Kushtetuese./tesheshi.com/
