Ambasadorja amerikane në OKB, Nikki Haley tha se Rusia dhe regjimi i presidentit sirian Bashar al-Asad kanë kryer më shumë se 100 sulme ajrore në Idlib.
Këshilli i Sigurimit i Kombeve të Bashkuara u mblodh sme kërkesë të Rusisë, dhe temat kryesore të sesionit ishte gjendja në Idlib të Sirisë dhe samiti trepalësh i cili u zhvillua ditët e fundit në Teheran, që mblodhi së bashku udhëheqësit e Turqisë, Rusisë dhe Iranit.
“Rusia, Irani dhe Assad nuk janë të interesuar për zgjidhjet politike të krizës. Kjo u pa kur Rusia dhe Irani refuzuan propozimin e Turqisë për një armëpushim”, tha Haley.
Ndërsa ambasadori rus, Vasilij Nebenzia tha se Rusia, Irani dhe Turqia ranë dakord për nevojën e eleminimit të të gjitha elementeve terroriste në të gjithë Sirinë.
Ai shtoi se në Idlib ka dhjetëra mijëra terroristë të Al Nusra-s dhe ISIS-it.
“Nuk ka zgjidhje tjetër për krizën siriane, përveç asaj politike. Për një zgjidhje të tillë është e nevojshme që grupet e armatosura siriane të opozitës vendosin të ndahen menjëherë nga terroristët”, tha Nebenzia.
Ai njoftoi se Rusia, Turqia dhe Irani do të vazhdojnë të kryejnë rolin e vendeve garant në procesin e paqes. /tesheshi.com/
