Ushtria amerikane ka akuzuar mercenarët rusë që luftojnë në anën e forcave në Libinë lindore për mbjelljen e minave tokësore dhe mjeteve shpërthyese të improvizuara në dhe rreth Tripolit.
Komanda e Forcës së SHBA në Afrikë (AFRIKOM) tha se fotot e verifikuara tregojnë se minat tokësore janë mbjellë në periferi të Tripolit dhe më tej në lindje, gjatë gjithë rrugës drejt qytetit të rëndësishëm strategjik bregdetar të Sirtes, që nga mesi i qershorit.
AFRICOM pretendon se Wagner Group, një kompani private e sigurisë e mbështetur nga Kremlini, e cila është e përfshirë në konfliktin në Libi, është prapa këtij veprimi, raporton AP.
Zyrtarët rusë dhe përfaqësuesit e Grupit Wagner nuk kanë komentuar ende akuzat e ushtrisë amerikane.
Lufta në Libi filloi në vitin 2011, kur një rebelim në vend, i mbështetur nga NATO, përmbysi Muammer Gaddafin, i cili u vra më vonë.
Vendi është i ndarë sot midis parlamentit në lindje, i cili është në aleancë me komandantin ushtarak, gjeneralin në pension Khalifa Haftar dhe Qeverinë Unitetit në perëndim, i cili mbështetet nga Kombet e Bashkuara.
Lindja ka mbështetjen e Emirateve të Bashkuara Arabe, Egjiptit dhe Rusisë, dhe Perëndimi ka mbështetjen e Turqisë, Katarit dhe Italisë.
Në tre muajt e fundit, forcat e Haftarit humbën pothuajse të gjitha territoret që okupuan gjatë ofensivës ndaj Tripolit, ndërsa Turqia rriti mbështetjen ushtarake ndaj rivalëve të saj.
Muajin e kaluar, ushtria amerikane akuzoi Moskën që dërgoi 14 aeroplanët MiG-29 në Libi për të mbështetur mercenarët rusë që luftonin përkrah ushtrisë së Haftarit, por Rusia hodhi poshtë akuzat si dezinformata.
KB pretendon se Wagner Group ka siguruar midis 800 dhe 1200 mercenarë për të mbështetur ofensivën e Haftarit në Tripoli, të cilët e bëjnë këtë për një tarifë mujore prej 1.500 dollarë. /tesheshi.com/
