SHBA afron vizitën në Ballkan të “njeriut të krizave”, Hoyt Yee në Tiranë para 25 qershorit. Përse?

Zyrtari i Lartë i Departamentit Amerikan të Shtetit, Hoyt Brian Yee ka afruar vizitën e tij në Tiranë, Prishtinë, Shkup, Beograd dhe Podgoricë që ishte parashikuar pas 25 qershorit.

Burime diplomatike, bëjnë të ditur se “njeriu i fortë” i administratës Trump për Ballkanin do të nisë udhëtimin menjëherë pas zgjedhjeve në Kosovë dhe mendohet të jetë data 15 apo 17 qershor.

Megjithëse nuk është vendosur dita e saktë e turit të ri ballkanik, mësohet se Hoyt Yee është alarmuar se skenari amerikan mund të hasë në probleme rrugës, ndaj ka vendosur t’i dalë para situatës.

Ndërsa në Prishtinë, parlamentit të ri do t’i caktohet data kur do të votojë Demarkacionin dhe Zajednicën, në Shkup ai do të ftojë zyrtarisht Zoran Zaevin për vizitë zyrtare në SHBA, kurse në Tiranë ai do të vijë për të firmosur një pakt të ri mes Edi Ramës dhe Lulzim Bashës për të vazhduar së bashku reformat e mëdha.

Plani paraprak ishte që ai të vinte në Shqipëri pas mbylljes së zgjedhjeve, por lëvizja e Moskës për të trazuar situatën ka shkaktuar alarmin e Uashingtonit.

Zbulimi i spiunit serb në trazirat e 27 prillit në Shkup dhe mundësia e aktivizimit të 400 mercenarëve rusë në trazirat ballkanike, ka shqetësuar thellësisht Uashingtonin për një lëvizje tektonike në rajon.

Ekziston madje një plan që nëse Hoyt Yee vendos që të vijë në Ballkan nga data 20 qershor, ai të qëndrojë në Tiranë edhe datën e zgjedhjeve parlamentare dhe të monitorojë votimet bashkë me një grup të madh vëzhguesish nga Shtetet e Bashkuara të Amerikës.

Përveç njerëzve që do të jenë në ekipin e OSBE-ODIHR-t, nga SHBA pritet të vijnë edhe një ekip kongresmenësh dhe senatorësh nga Komiteti Amerikan i Helsinkit, si dhe nga Organizata Helsinki Watch.

Po ashtu stafi i ambasadës së SHBA në Tiranë dhe një grup veprimtarësh civilë, pritet të udhëhiqen nga zoti Yee më datë 25 qershor.

Ajo që pwrbwn më tw rëndësishmem e këtij turi është pikërisht angazhimi i përbashkët i Edi Ramës dhe Lulzim Bashës, për një pakt paszgjedhor për reformat e mëdha.

Shumë vetë kanë folur pas 17 majit për bashkëqeverisje, gjë që nuk duket shumë e pamundur, pas edhe prononcimit të eurodeputetit gjerman, Fleckenstein, se “bashkëqeverisja me koalicion të madh nuk është një dramë”, por amerikanët janë të interesuar më shumë në një marrëveshje të qëndrueshme PD-PS për zgjedhjen e të gjithë isntitucioneve të reja të drejtësisë, të cilat kërkojnë të paktën 84 vota.

Gjatë ditëve të punës së komisioneve të vetingut është vënë re një fenomen: ngadalësimi dhe bllokimi prej disa anëtarëve të opozitës, por realisht ata në fund do të duhet të votojnë kandidatët që vijnë nga lista e ndërkombëtarëve të OMN-së. Disa ditë më parë, nënkryetari i LSI-së, Luan Rama dhe ish-ministri i Brendshëm Flamur Noka që përfaqëson PD-në, akuzuan ndërkombëtarët që kanë dërguar në komision kandidatë që ata i shikojnë si “njerëz të Edi Ramës”.

Këto lëvizje janë shikuar nga Uashingtoni, si një rezistencë e paktit tashmë të firmosur mes PD-së dhe PS-së për vazhdimin pa pengesa të procesit të vetingut.

Ka shumë gjasa që gjatë vizitës në Tiranë të emisarit të lartë të Departamentit të Shtetit të SHBA, komisioni i vetingut të kalojë të paktën kandidaturat që duhen për të zgjedhur Komisionin Kombëtar të Vetingut dhe Komisionin e Apelimit të Vetingut, të cilët më pas, gjatë gjithë verës, përkatësisht në korrik dhe gusht, të mbyllin gjithë rivlerësimin e kastës aktuale të gjyqtarëve dhe prokurorëve, për të nisur menjëherë në shtator konstituimin e Këshillit të Lartë të Gjyqësorit, Këshillit të Lartë të Prokurorisë, zgjedhjen e Kryeprokurorit të ri të Republikës, Prokurorin e Përgjithshëm Special, si dhe Drejtorin e Byrosë Kombëtar të Hetimit.

Gjatë vizitës në Tiranë Hoyt Yee pritet të sjellë përfundimisht mesazhin që ky proces do të duhet të përfundohet sido që të venë zgjedhjet.

Por, që nëse ai favorizon një pakt shtesë Rama-Basha, duket se mesazhi amerikan është edhe politik, që tregon qartë se kush janë partnerët e tyre. /tesheshi.com/