Nga Mensur Krasniqi
U përshkrua si një akt i rrallë moral në politikën e shqiptarëve të Maqedonisë ai i Arben Taravarit, sekretar i i përgjithshëm i Lëvizjes për Reforma në PDSH, i cili tha se do garojë i 20-ti në listë për deputet, si për ta bindur të birin së nuk është në politikë si interesaxhi i rëndomtë – aq më pak si hajdutë – siç i biri i shikonte homologët e të atit në politike; por ja që nuk e ka mbajtur fjalën. Taravari figuron i dyti në listën e deputetëve, edhe për më tepër zonën e qytetit të Shkupit, edhe pse është i lindur në Gostivar. Dhe kjo e ka shastisur – kësaj here për të keq – opinionin maqedonas, i cili është ndjerë i tradhëtuar nga ky akt. Të menjëhershme kanë qenë reagimet, ku ndër to veçohet ai i ish-kandidatit për zgjedhje lokale nga rradhët e Partisë Demokratike Shqiptare, Azbi Nuredini.
Sipas tij, Taravari përmes numrit 20 ka synuar bartësin e listës, dhe kjo gjë është mjaft shqetësuese ngase paraqet versionin copy-paste të partive simotra, BDI-PDSH-së, që importojnë kandidatë nga zonat tjera që të garojnë në Shkup.
“Doktor nuk ishte”llafi”kështu në publik! “Tash po i bie që përmes numrit 20 të synohet numri 1”?!
Thonë dita shihet që në mëngjes!
Nëse jemi kundër përbuzjeve të ndryshme që na i bëjnë partitë politike aktuale na thoni pse i kopjoni ato?!
Sa për ilustrim BDI dhe PDSH në zonën 1 disa herë kanë “importuar”kandidat nga Kërçova e Tetova dhe i ka nominuar për tu zgjedhur nga votuesit e kësaj zone, tash edhe ju po i kopjoni?!
A e dini ju të nderuar se sa votues shqiptar ka në këtë zonë?
Ja po ua kujtoj vetëm në komunën e Sarajit ka mbi 29.000 votues në Karposh mbi 5.000 votues në pjesën e Çairit që bie në këtë njësi zgjedhore mbi 20.000 votues në Studeniçan mbi 10.000 votues shtuar këtu edhe votuesit shqiptarë të komunave Qendër,Kisela Vodë,Sopishtë janë mjaft për të gjetur një personalitet për ta kandiduar në zgjedhje!
A nuk është ofendim për vet ju i nderuar dr.Taravari që të pranoni një gjë të tillë?!”
Në demokraci ska organ partiak që mund të vihet mbi dinjitetin e njerëzve.
E kishim fjalën për parime apo për kopjime?!”, ka pyetur publikisht në rrjetin social facebook, Azbi Nuredini.
Por Taravari e ka gjetur një justifikim të aktit të tij prej “besëthyeri”, si për kolegun Abazi e si për opinionin mbarë. Po në facebook, ai është shprehur se ishte jo ai por partia që vendosi për të.
“I nderuar mik Azbi Nuredini, kjo përgjigje është për ty dhe për të gjithë ata që mendojnë se unë kam kthyer mendje nga deklarata ime për të qënë i 20-ti në listat zgjedhore për deputetë të ardhshëm.
Jo! Në asnjë moment nuk kam hequr dorë nga kjo dëshirë, bindje apo vizion.
Por në mbledhjen e Këshillit të partisë pavarsisht që të gjithë u njohën me dëshirën time,të gjithë unanim vendosën që të kandidoja në pozicionin e dytë në listën përkatëse zgjedhore.
Kishte vetëm një votë kundër dhe kjo ishte vota ime.
I dashur mik, unë nuk i largohem mendimit tim për pozicionim sa më pak të favorshëm, por duhet të dini që qëllimi im është Liria dhe Demokracia, dhe unë do kthehesha në një diktator fashist nëse do të imponoja vullnetin e 150 anëtarëve të Këshillit që votuan pro meje!
Unë nuk kam ndërmend të shkatërroj partinë tonë të cilës i besoj dhe i bindem vendimeve të shumicës.
Nëse do kisha pasur ambicie parlamentate të mirëfillta ju siguroj që do preferoja Gostivarin apo Tetovën, qytete ku jeton familja dhe fisi im.
Vazhdoj besoj fuqimisht që jam një mjek shumë më i mirë se sa politikan dhe pas disa javësh do ti dedikohem më shumë fushës time.
Dhe një gjë miku im, nuk e besoj kurrë që populli të jetë aq naiv sa të vendosë kushte kaq qesharake si p.sh: më të mirët të jenë të fundit në listë sepse kështu do të jenë të besueshëm…sepse lind direkt një pyetje retorike-e kush duhet të jetë në krye të listës, më të Këqinjtë?!
Jam i bindur në qëllimet e tua dashamirëse, dhe e di se më keni kuptuar”, kështu është sqaruar Arben Taravari.
E megjithatë, ky rast i fundit me Taravarin e ka forcuar akoma dhe më tej bindjen në opinion se premtimet e aktorëve politikë nuk duhen marrë seriozisht.
Të njëjtën shije ka lënë më parë edhe lideri i PDSH-së, Menduh Thaçi, i cilinë zgjedhjet e fundit parlamentare u përbetua se nëse do t’i humbë do të japë dorëheqje nga politika, por ja që nuk ndodhi dhe ai vijon të drejtojë PDSH-në pa asnjë vraje ndërgjegjeje, gjë që çoi tek dorëheqja e Ziadin Selës nga PDSH-ja, pra larg Thaçit, që formoi më pas partinë e re Lëvizjen për Reforma në PDSH.
E tani mbetet të shihet se di do reagojë vetë ky u fundit pas premtimit të bërë para disa muajsh në emisionin “200” në televizionin“Alsat-M” se nëse i humb zgjedhjet nga BDI-ja të paktën me një votë atëherë do të japë dorëheqje.
Por duke shikuar rejtingun e dobët të LR-PDSH-së në sondazhet e fundit të anketave të ndryshme, parashtrohet pyetja nëse Ziadin Sela do japë dorëheqje pas humbjes eventuale në zgjedhjet e parakohshme parlamentare që pritet të mbahen më 11 dhjetor të këtij viti, apo do të shfaqë mendësinë e Thaçit, por dhe Taravarit e të tjerëve para tyre, se ishte partia ajo që vendosi…mos e japë dorëheqjen! /tesheshi.com/
