Një pjesë e malit të Sharrit në Maqedoni po zhvishet nga gjelbërimi, dhe kjo vetëm për shkak të një rruge që po ndërtohet në zemër të Leshnicës. Është e dhimbshme të shohësh se si drunjtë shumëvjeçar janë shkulur me rrënjë.
Organizatat joqeveritare dhe personat fizikë të rajonit të Pollogut dhe Shkupit, të njohur si Platforma “Miqtë e Sharrit” e cila lobon që ky duhet shpallur si “Park Nacional”, po reagojnë ashpër. “’Miqtë e Sharrit’ konsiderojnë se ndërtimi i rrugëve në zemrën e parkut të ardhshëm, respektivisht në zonën e cila në ardhmëri do ishte e mbrojtur. është absurde dhe shqetësuese për botën shtazore në këtë pjesë”, deklarohet prej tyre.
Zhivko Temelkovski, një alpinist shumëvjeçar, i cili me bukurit e këtij vendi është mburrur ndaj kolegëve të vendeve tjera, thotë se tani i vjen rëndë ndaj tyre me këtë që po ndodh
“Thjesht më besoni se rrugën drejt pyllit e ndjej sikur dikush të më rrjepë lëkurën”, thotë ai.
“Miqtë e Sharit” apelojnë që urgjentisht të ndërpriten punimet dhe të mos shkartohen bukuritë e këtij vendi.
“Në vend që të gjithë së bashku të punojmë për mbrojten e malit, 20 ditët e fundit kjo zonë shkatërrohet me ndërtimin e rrugëve. Platforma nuk është e njoftuar nëse rrugët për Leshnicë të Lartë dhe Xhinibeg janë të ndërtuar në bazë të ndonjë plani dhe nëse për ketë ekziston ndonjë elaborat për ndikimin e tyre ndaj ambientit jetësor. Konsiderojmë se ekzistimi i rrugëve do të jetë kërcnim për botën e gjallë respektivisht ajo që ngeli nga dhitë e egra, si dhe kafshëve tjera ta ergra sic janë ujku dhe ariu”, deklaroi Jovan Bozhinovski, anëtar i platformës.
“Me punimet e fundit të cilat zhvillohen rreth 6 kilometër brenda në thellësi të zemrës së malit Sharr mendojmë se prishet biodiversiteti i këtij rajoni”, tha nga ana tjetër Metin Muharremi, iniciator i platformës “Miqtë e Sharit”.
Leje ndërtimin për këtë rrugë e ka dhënë Agjencia për Kullosa dhe Ndërmarrja Publike në Leshnicë Tetovë.
Leshnica është një ndër vendet më të njohura të Sharrit, si në aspekt peisazhor ashtu në atë geomorfologjik, gjeologjik, si dhe e begatshme me biodiversitet. /tesheshi.com/
