“Çdo sekondë të karrierës sime kam menduar të jem një ditë pjesë e kombëtares së Shqipërisë”.
Kështu është shprehur në konferencë për shtyp, sulmuesi Liridon Latifi, i cili është thirrur në grumbullimin e kuqezinjve nga trajneri Panuci, pas paraqitjeve të shkëlqyera me Skënderbeun.
Duke shpresuar se trajneri do t’i japë disa minuta lojë gjatë dy ndeshjeve të rradhës, 23 vjecari thekson se do të jetë i gatshëm që cdo sekondë, të japë kontribut për Kombëtaren.
“Shpresoj që aftësitë e mia t’i shpreh edhe në Kombëtare. Është e rëndësishme edhe për karrierën time. Shpresoj që këtë formë që kam, ta shpreh edhe në Kombëtare”, shprehet Latifi. Lidhur me objektivat e përfaqësueses në ndeshjet ndaj Lihtenshtejnit dhe Maqedonisë, Latifi thekson se do të luhet për 6 pikë.
“Janë dy ndeshje shumë të rëndësishme. E para me Lihtenshtejnin është të shtunën dhe duhet të jetë fokusi jonë kryesor. Çdo ndeshje me Kombëtaren është e rëndësishme. Çdo pikë duhet ta marrim, nuk duhet të humbim asnjë rrugës”, deklaron sulmuesi që sapo është transferuar në Hungari, tek Puskas Akademi.
“Ata kanë bërë një projekt shumë të madh për të ardhmen, kanë bërë shumë gjëra në aspektin e projekteve. Ka qenë edhe ana financiare që më kënaqi mua dhe klubin ndaj zgjodha atë skuadër”, shpjegon Latifi. /tesheshi.com/
