Ylli i serialit hit nga vitet ’90 – “Beverly Hills 90210”, Shannen Doherty, 49 vjeçe, po lufton me një sëmundje malinje dhe ka shqetësuar publikun për seriozitetin e gjendjes së saj shëndetësore.
Ajo së fundmi tha se tashmë po përgatit letra lamtumire për të dashurit e saj. Ajo gjithashtu gjeti një këngë që dëshiron të luhet për të në lamtumirën e fundit – “Tears in Heaven”.
Tani ajo thotë se si u përgatit dhe me çfarë dëshiron të varroset.
“Unë e di se çfarë dua rrugës për në botën tjetër. Kam përgatitur një fustan që kam marrë nga një prej miqve të mi më të mirë disa vjet më parë. Ndihem e veçantë me të. Dua të jem e bukur. Dua të qëndroj në kujtesën më të mirë të të gjithëve.
Unë jam përpjekur muajt e fundit të korrigjoj disa marrëdhënie; të kërkoj falje ndaj njerëzve që kam lënduar, me vetëdije ose pa vetëdije. Mundohem ta jetoj jetën në maksimum dhe të shijoj pak kohë që më ka mbetur”, tha Shannen.
Ylli i aktrimit mësoi në shkurt të vitit të kaluar se kanceri i gjirit i kishte metastazuar në shtyllën kurrizore. Pasi iu nënshtrua një operacioni, kimioterapisë dhe rrezatimit, duket sikur u përmirësua, por më pas filloi të ndjente dhimbje të forta shpine e atëherë mësoi lajmin e tmerrshëm – kanceri u përhap përtej gjinjve dhe nyjeve limfatike deri në shpinë.
Mjekët e paralajmëruan atë se kanceri ka të ngjarë të metastazonte në tru, mushkëri dhe mëlçi.
Aktorja aktualisht është në terapi hormonale për të bllokuar estrogjenin që është duke shkaktuar rritjen e kancerit, ndërsa në të njëjtën kohë merr një ilaç tjetër që është treguar se ndihmon në terapinë e saj. /tesheshi.com/
