Banorët e Pekinit përmbytën supermarketet të hënën për të furnizuar me ushqime, duke dashur të shmangin mungesat si ato në Shangai në rast se shpallet sërish një bllokim në të gjithë qytetin, shkruan Guardian. Përkatësisht, kryeqyteti i Kinës po shënon një numër në rritje të personave të infektuar me COVID.
Autoritetet në Pekin kanë urdhëruar 3.5 milionë banorë dhe punëtorë në rrethin më të madh të Chaoyang-ut të kryejnë tre teste të koronavirusit këtë javë, pasi zona regjistroi 26 nga gjithsej 47 raste simptomatike në qytet që nga e premtja.
Kina raportoi 3,266 raste simptomatike dhe 20,454 raste asimptomatike të hënën. Shumica e tyre ishin në Shangai, ku u raportuan 19,455. Pekini raportoi 19 raste të hënën, përfshirë 14 simptomatike.
“Epidemia aktuale në Pekin po përhapet shumë shpejt nga burime që janë ende të panjohura,” tha një zyrtar lokal të dielën.
Në Pekin, rrugët janë më të qeta se zakonisht, dhe ka më pak klientë në restorante. Gjatë drekës të hënën, qindra pritën në radhë në vendet e testimit në të gjithë Chaoyang-un, por koha e pritjes zakonisht nuk është më e gjatë se një orë.
Autoritetet shëndetësore kineze shpresojnë të shmangin atë që po ndodh në Shangai, i cili i ka rezistuar prej kohësh mbylljes.
Por tani, pas katër javësh, mbyllja në Shangai ka çuar në mungesa të mëdha ushqimore dhe vonesa të dërgesave, kryesisht për shkak të mbylljeve të rrugëve dhe mungesës së shoferëve të dërgesave, duke çuar në pengesa në transport dhe pakënaqësi të përhapur. /tesheshi.com/
