Kryeministri Rama ka bërë një “lëvizje guri” ndaj kryeministrit Kurti në një “lojë shahu” që po zhvillohet mes tyre në një tjetër klimë fërkimesh në distancë.
Një ditë pasi kreu i qeverisë kosovare vuri kushtin e mbledhjes së dy qeverive, apo ndryshe firmosjen e disa marrëveshjeve, për t’u takuar në kuadër të turit ballkanik të kryeministrit shqiptar, ky i fundit i është përgjigjur:
“Pas pak drejt Shkupit për të nisur vizitën dyditore në kryeqytetet e Ballkanit Perëndimor.
Sot të mëngjes janë dorëzuar në ministrinë e jashtme në Kosovë të 13 marrëveshjet e mbledhjes së dy qeverive të firmosura nga ana jonë. Me kundërfirmosjen e palës kosovare ato hyjnë menjëherë në fuqi.
Mbetem me shpresë se pas heqjes së merakut të shprehur publikisht nga KM Kurti për qytetarët e penguar të përfitojnë nga 13 marrëveshjet, do të kemi edhe konfirmimin e takimit me Albinin sot pasdite”, shkruhet nga Rama.
Kjo përgjigje e Ramës ishte për këtë pretendim të Kurtit:
“Ishin 13 marrëveshje, të mos mbeten në sirtar. Në mënyrë që këto marrëveshje të mos ngelen në sirtar, unë i propozova Ramës që meqë po vjen këtë javë, le ta mbajmë edhe mbledhjen e përbashkët të dy qeverive tona, t’i nënshkruajmë marrëveshjet të dakorduara dhe në mënyrë këto marrëveshje t’i zbatojmë”.
Tashmë pritet se si do reagojë Kurti ndaj kësaj lëvizjeje të Ramës në fushën e një “shahu politik” mes tyre, ku përfshihet dhe krenaria tipike shqiptare për të mos e ulur hundën para tjetrit. /tesheshi.com/
