Kur tesheshi.com para një jave publikoi skenarin e detajuar të Metës për largimin nga koalicioni qeveritar, asnjë nga qarqet relevante politike por edhe mediatike nuk e panë si mundësi analize dhe parashikimi të asaj çfarë do do të ndodhte, por konsumuan përplasje e përplasje derisa kreu i LSI-së doli në konferencë pas mbledhjes së kryesisë së partisë së tij dhe tha se do të jepte dhe mandatet për “çadrën” e opozitës.
Megjithatë duhet thënë se ajo që u publikua ishte një pjesë e skenarit të menduar mirë dhe të përgatitur që në verë nga Ilir Meta, pasi pjesa e dytë apo skenari nr. 2 do të jetë më i ndërlikuari dhe më i paparashikueshmi.
Ç’do të ndodhë kur Ilir Meta do të shpallë largimin e ministrave me një qëndrim që e mbështet qeverinë nga jashtë për të siguruar stabilitet, por nga ana tjetër i kërkon Ramës që të plotësojë kërkesat e PD-së, pra të largohet?
Ilir Meta, madje është gati që të heqë edhe gurin e fundit në lojë, tërheqjen e anëtarit të KQZ-së në mënyrë që të përshkalëzojë krizën.
Por siç mësohet, Edi Rama ka përgatitur kundërpërgjigjen nëse Meta largon ministrat: do të kërkojë votëbesimin e Parlamentit dhe do të shpallë dorëheqjen e qeverisë.
Ç’do të ndodhë më pas?
Do të duhet që qeverinë të formojë pjesa tjetër, pra PD me LSI-në dhe aleatët e vegjël.
Nëse do të bëhet kjo, atëherë Basha me Metën do të mbajnë në shpinë peshën e një pazari politik; por nga ana tjetër edhe peshën e rëndë të vonesës së Vettingut që pritet të bëhet çështje kauzale në zgjedhje.
Nëse nuk do të formohet ndonjë qeveri, ashtu siç pritet, atëherë vendi shkon në zgjedhje të parakohshme për 45 ditë; që i bie motamo më 18 qershor dhe nuk do të duhet të dekretohet një datë e re.
Meta e di shumë mirë këtë dhe, qetësia e shtuar tek Edi Rama ka si çelës pikërisht mungesën e hapësirës për të manovruar nga ana e opozitës dhe LSI-së, të cilat nëse do të luajnë hapur gjithsesi nuk mund t’i shmangen ballafaqimit elektoral.
Por si është skenari?
Sipas ish-kryetarit të KQZ-së, Kristaq Kume, data finale për regjistrimin në zgjedhjet e 18 qershorit nuk është 10 prilli që u shpall dje, por 19 maji. Ka ndodhur si precedent në zgjedhjet e shkuara që gjithçka është bërë ditët e fundit, kur dhe duhet të dorëzohen listat e kandidatëve për deputetë.
Ndaj çështja do të shtyhet deri më 7 maj, kur të zhvillohen zgjedhjet e Kavajës për kryetarin e ri të bashkisë.
Lulzim Basha ka shpallur një protestë kombëtare në Kavajë.
Nuk dihet nëse kjo protestë do të jetë thjesht tubim apo do të ketë aksion për të ndaluar hapjen e qendrave të votimit për qytetarët që të shprehin vullnetin e tyre të lirë për kreun e qytetit.
Gjithsesi më 7 maj Kavaja do të jetë e mbushur me kamera, vëzhgues dhe ambasadorë, kështu që më shumë se një luftë me kutitë, 7 maji i Bashës do të jetë një demonstrim politik kundër 7 majit të Ramës.
Qëllimi do të jetë që të sigurojë që sa më pak njerëz të shkojnë për të votuar duke krijuar mundësitë e një delegjitimi të procesit.
Dhe pikërisht Kavaja do të jetë prova gjenerale e këtij koalicioni të ri që po profilizohet mes PD-së dhe LSI-së.
Pas datës 7 maj do të bëhen më të qarta edhe ndarja e roleve brenda opozitës së re dhe arsenali i tyre kundër Edi Ramës.
Po qeveria teknike? Që të ndodhë do të duhet që të marrë konsensusin e PS-së! Që Edi Rama ka thënë që nuk do t’ja japë…/tesheshi.com/
