Prokurorja e përgjithshme amerikane në detyrë, Sally Yates, është shkarkuar nga presidenti Donald Trump për sfidën e hapur ndaj urdhrit ekzekutiv për emigracionin dhe refugjatët.
“Prokurorja e përgjithshme në detyrë, Sally Yates, ka tradhtuar Departamentin e Drejtësisë duke refuzuar të zbatojë një urdhër të ligjshëm që ka për qëllim të mbrojë qytetarët e Shteteve të Bashkuara,” thuhej në një njoftim të zyrës për shtyp të Shtëpisë së Bardhë.
Prokurorja i kishte urdhëruar të hënën juristët e Departamentit të Drejtësisë të ndalonin së mbrojturi urdhrin ekzekutiv të Trump-it.
Në vend të saj, detyrën e ka marrë përkohësisht Dana Boente, prokuror i Distriktit Lindor të Virxhinias. I sapovëni në detyrë i deklaroi Washington Post-it se do ta zbatonte urdhrin ekzekutiv të Trump-it për emigracionin.
Detyra e tij do të jetë e përkohshme, derisa senati të japë pëlqimin për të zgjedhurin e Trump-it për prokuror të përgjithshëm, senatorin Jeff Sessions.
Urdhri ekzekutiv i presidentit të ri amerikan, që pezullon për 120 ditë programin për refugjatët të SHBA-së dhe u mbyll dyert refugjatëve nga Siria dhe qytetarëve nga shtatë vende muslimane, mbetet akti më i diskutueshëm i tij që prej marrjes së detyrës. Në SHBA e më tej ka qenë e madhe dallga e kundërshtisë ndaj këtij urdhri, pjesë e së cilës u bë dhe prokurorja e përgjithshme amerikane, e cila e pagoi qëndrimin e saj me shkarkimin nga detyra. /tesheshi.com/
