Premier Liga angleze ofron tre përballje kritike në luftën për titull.
Mbajtësit e vendit të gjashtë dhe të tretë në renditjen e kampionatit, Uest Hemi dhe Arsenali, do të ndeshen sot në mesditë, në 13:45, dhe humbja e çdo pike do t’i kushtojë rëndë secilës prej skuadrave. Posaçërisht për topçinjtë do të merrte thuajse fund ëndrra për ta fituar kampionatin nëse nuk do të merrnin sot tre pikët.
Të dielën, Lestëri kryesues luan në fushën e Sandërlendit, në një takim mjaft delikat. Vendasit e Sandërlendit luftojnë për të mos rënë nga kategoria, çka i bën ata mjaft të rrezikshëm.
Supersfida do të jetë Totenhem – Mançester Junajted. Edhe ky është një ballafaqim me shumë peshë për të dy ekipet. Veçanërisht për Totenehemin, që është ndjekësi më i afërt i Lestërit.
Më e forta sfidë e Serisë A italiane luhet sonte. Milani dhe Juventusi ndeshen në “San Siro”. Janë përballë dy skuadra me paraqitje krejt të ndryshme. Milani lëngon prej kohësh, e Juventusi mbizotëron prej vitesh në futbollin italian. Një ballafaqim mes dy skuadrave me objektiva krejt të ndryshme, por që natyrisht ia vlen të ndiqet.
Ndër takimet e tjera të kampionatit italian janë: Frosinone – Inter, Empoli – Fiorentina, Napoli – Verona dhe Roma – Bolonja.
Në Primera Divizionin spanjoll, tre skuadrat e elitës do t’i zhvillojnë këtë pasdite ndeshjet e tyre të javës së 32-të.
Reali i Madridit luan ndaj Eibarit, Atletiko e Madridit ndeshet menjëherë më pas në fushë kundërshtare me Espanjolin, e në mbrëmje kemi sfidën Real Sociedad – Barcelona.
Nuk duhet harruar derbi i Ruhrit në Bundesligë, që vë përballë të dielën Shalken me Borusian e Dortmundit. /tesheshi.com/
