Në pritje të ardhjes së sasisë së radhës së vaksinave Pfizer në Rinas, kryeministri Rama tha se beteja për fondet e Rindërtimit nuk paska qenë asgjë në raport me këtë për vaksinat.
Sipas tij, shteti për shtetin është kthyer në ujk.
“Një gjë duhet ta dinë të gjithë: kjo nuk është çështje parash.
Çmimet e vaksinave po rriten, se kërkesa është shumë e ethshme dhe dhe prodhimi shumë i vogël, por sado që të rritet ne nuk do të lëmë asnjë dozë që kemi në dispozicion apo të lëmë qoftë edhe një shqiptar pa vaksinuar.
Vaksinat nuk janë në treg, nuk ka lidhje me çmimin apo buxhetin; duhet një angazhim i gjithanshëm dhe një këmbëngulje e tmerrshme për sigurimin e tyre.
Gjëja më e vështirë ishte që të gjeja fondeve për të mbështetur Rindërtimin në krahasim me përpjekjen për të gjetur vaksinën, e tani më duket se ai ka qenë një proces normal dhe isha gati t’i rikthehesha tre herë Rindërtimit dhe të mos kisha barrë së bashku me koleget për vaksinat, pasi realisht është në çmenduri. Është çështja për të gjetur diçka që nuk e ka askush.
Këtu është ajo shprehja e vjetër se ‘njeriu bëhet ujk për njeriun’; është e përditshmja e luftës për vaksinat. Shteti ujk për shtetin, njeriu ujk për njeriun. Jemi para faktit që nevoja e të gjithëve është kaq e madhe dhe bëhet fjalë për një sasi të vogël dhe të gjithë ujqërit duan të marrin”, tha Rama.
I pari i qeverisë tha se po negociohet tashmë dhe për një sasi nga AstraZeneca.
Ndërkohë vazhdojmë çdo ditë përpjekjen për të finalizuar një marrëveshje të rëndësishme me një shtet mik për një sasi prej 360 mijë dozash të AstraZeneca. Po ashtu jemi në komunikim dhe me 2 shtete të tjera që të shtojmë sasinë e vaksinave në mënyrë që të mos kemi asnjë moment ndalim apo rënie të tempit që të rrisim tempin progresivisht që të vaksinojmë popullatën brenda 14 muajve.
Objektivi i 14 muajve është shumë ambicioz.
Shumë shpejt do kemi lajme të mira. Vazhdojmë furnizimin me vaksinën Pfizer”, tha Rama.
Po ashtu, ai propozoi një marrëveshje mes forcave politike për llojin e fushatës që duhet bërë nën masat COVID, për të patur një konsensus.
“Po mendoj se forcat politike, të paktën forcat kryesore, të merren vesh se çfarë do bëjmë dhe si do ja bëjmë deri më 25 prill. Çdo shtrëngim masash do të interpretohet si një reagim diktatorial i Edi Ramës. Kjo nuk është problem i kostos personale se çfarë bëri një më shumë, por problem i efektit.
Jemi duke e diskutuar do të shohim nëse do gjejmë një rrugë duke iu referuar ekspertëve që të kemi i një marrëveshje për rregullat që duhet të respektohen nga të gjithë.
Jemi para një fushate elektorale dhe duhet të gjejmë një zgjidhje, të shohim nëse mund të bëjmë diçka pasi do ishte mirë për të gjithë”, tha Rama. /tesheshi.com/
