Kryeministri i sapozgjedhur suedez Ulf Kristersson tha se Suedia mbetet e përkushtuar ndaj marrëveshjes me Turqinë për anëtarësimin në NATO.
“Anëtarësimi në NATO është vendimtar për Suedinë dhe Finlandën. Jemi të përkushtuar për zbatimin e marrëveshjes me Turqinë”, tha ai për Anadollia-n pasi Parlamenti suedez i besoi postin e kryeministrit.
Ai theksoi se qeveria e tij do të bëjë përpjekje maksimale për të përmbushur kërkesat e marrëveshjes ndërmjet Turqisë, Suedisë dhe Finlandës.
Vendet skandinave aplikuan zyrtarisht për t’u anëtarësuar në NATO në qershor të këtij viti, një vendim i nxitur nga lufta e Rusisë kundër Ukrainës.
Megjithatë, Turqia, si një anëtare e NATO-s, ka shprehur kundërshtime ndaj ofertave të tyre për anëtarësim, duke kritikuar Suedinë dhe Finlandën për tolerimin dhe madje mbështetjen e atyre që ajo i konsideron grupe terroriste.
Kërkesat në pritje të Ankarasë
Të tre vendet nënshkruan një memorandum trepalësh mirëkuptimi në samitin e NATO-s në qershor në Madrid, i cili përcakton se Finlanda dhe Suedia nuk do të ofrojnë më mbështetje për ato grupime që Ankaraja i ka përfshirë në Listën e saj të Zezë
Finlanda dhe Suedia ranë gjithashtu dakord të trajtojnë kërkesat në pritje nga Ankaraja për të dëbuar ose ekstraduar të dyshuarit për terrorizëm.
Parlamenti turk duhet të ratifikojë miratimin që Suedia dhe Finlanda të bëhen anëtarë të rinj të NATO-s.
Kristersson tha se priste të zhvillonte takime me zyrtarët turq për këtë çështje. /tesheshi.com/
