Greqia planifikon të mirëpresë turistët e parë në 1 korrik.
Turistët do të jenë në gjendje të vijnë përsëri në Greqi në korrik, tha sekretari i shtetit Giorgos Gerapetrit.
“Ne do të hapemi për turizëm në 1 korrik,” tha Gerapetrit.
Detajet mbi rinisjen e industrisë së turizmit, përfshirë mbështetjen financiare, do të përcaktohen deri më 15 maj, shtoi ai.
Njoftimi i Gerapetrit është në përputhje me një deklaratë të mëparshme të kryeministrit Kyriakos Mitsotakis, që së pari duhet të vendosen protokolle për udhëtime të sigurta.
Industria e turizmit gjeneron 30 përqind të produktit të brendshëm bruto të Greqisë (PBB) dhe jep kontributin e vetëm më të madh në buxhet.
Pandemia ka krijuar panik midis hotelierëve, agjencive të udhëtimit dhe industrive të lidhura me to, dhe një e treta prej tyre kanë frikë nga falimentimi.
Zyrtarët vlerësojnë se vendi humbi 22 miliardë euro dhe rreth 45,000 vende pune si rezultat i pandemisë.
Danezët, më të kujdesshëm me turistët
Nga ana tjetër, Danimarka nuk ka ndërmend të hap kufirin e saj për turistët që dëshirojnë të vizitojnë këtë vend skandinav.
“Turistët nuk duhet të udhëtojnë në Danimarkë, pasi ato mund të sjellin një infeksion virusal,” tha ministri i Drejtësisë Nick Haekkerup.
Ai tha se disa kryetarë bashkish kanë shprehur dëshirën që Danimarka të hap kufijtë e saj për turistët nga Gjermania fqinje, të cilët janë një grup kyç kur bëhet fjalë për tregun danez të turizmit.
“Sigurisht që as qeveria dhe as unë nuk dua që kufijtë të mbyllen më gjatë seç duhet,” shtoi Haekkerup.
Shteti gjerman i Schleswig-Holstein, i cili kufizohet me Danimarkën, ka njoftuar hapjen e kufirit të tij me këtë të fundi më 15 maj.
Ndërkohë, qeveria daneze po lehtëson kufizimet.
Kopshtet e fëmijëve dhe shkollat deri në klasën e pestë u hapën si pjesë e fazës së parë në prill, dhe për të dytën, e cila është në diskutim, kryeministri Mette Frederiksen tha se qeveria dëshiron të hapë supermarkete, restorante dhe kafene. /tesheshi.com/
