Me garën e Melburnit, në Australi, merr udhë sezoni i ri në Formula 1, veprimtaria më e ndjekur sa i takon automobilizmit. Një sezon i gjatë, me 20 gara, që si mbarim të tij ka 26 nëntorin, ditë në të cilën garohet në Abu Dhabi.
E veçanta e parë e këtij sezoni është mungesa e Nico Rosberg-ut. Për herë të parë që nga 1994-ta, kampioni në fuqi nuk do të jetë në pistë për të mbrojtur titullin. Një tërheqje të ngjashme me atë të Rosberg-ut pati bërë dhe Alain Prost në vitin 1993.
Një e veçantë tjetër janë ndryshimet në rregullore, shoqëruar me ndryshimet në makina, që pritet të sjellin surpriza. Deri tani, më mirë në prova janë paraqitur Mercedes-i dhe Ferrari, por fakt është se asnjëherë skuadrat nuk e shfaqin potencialin e tyre të vërtetë në provat parasezonale.
Nga pilotët, Lewis Hamilton është favoriti kryesor, me urinë për t’u kthyer te fitimi i trofeut pas ndërprerjes së rrugës vitin e shkuar nga shoku i tij i skuadrës. Në krah do të ketë këtë vit një finlandez te Mercedes-i.
Valtteri Bottas nuk ka fituar ende një garë në Formula 1, edhe pse është ngjitur nëntë herë në podium. Ai e di se së pari duhet t’i tregojë skuadrës që e përzgjodhi se nuk ka gabuar që e pa atë si zëvendësuesin e Rosberg-ut. Megjithatë, ai sigurisht që nuk është marrë për të bërë vetëm pilotin e dytë; as Bottas vetë nuk do të pranojë të mbetet nën hijen e Hamilton-it.
Te Ferrari ka një optimizëm në rritje se dyshja me përvojë e pilotëve, dy kampionë bote, Sebastian Vettel dhe Kimi Raikkonen, mund të sjellin titullin për konstruktorë, që mungon prej 2008-s. E nëse Ferrari tregon në gara se është vërtet këtë sezon një makinë shumë e shpejtë, Vettel dhe Raikkonen do t’i kenë të tëra mundësitë për të kërkuar të shtojnë një titull tjetër kampion në karrierën e tyre.
Red Bull-i, me Daniel Ricciardo-n dhe Max Verstappen-in, dy pilotë shpërthyes, mbetet sërish mes skuadrave të para. Në prova është treguar se Red Bull-i qëndron prapa Mercedes-it dhe Ferrari-t, veçse ashtu si sezonin e shkuar, paraqitjet mund të njohin përmirësim të ndjeshëm kur garat të pasojnë njëra-tjetrën.
Nga makinat që kërkojnë të rriten, McLaren nuk ka bindur deri tani. Besueshmëria është problematike, në prova janë bërë pak kilometra për shkak të defekteve. Fernando Alonso ka sugjeruar një fundjavë të vështirë në Melburn.
Çfarëdo që të thuhet, mbetet vetëm të shihet gara e parë të dielën për të kuptuar sado pak se ç’premton ky sezon i Formulës 1. /tesheshi.com/
