Spanjollët e Seviljes bëhet mbajtës të një rekordi të veçantë. Si asnjë skuadër tjetër, Sevilja e ka fituar Ligën e Europës tre herë radhazi. Veç kësaj, është e vetmja skuadër që e ka fituar pesë herë trofeun e këtij aktiviteti, me dy herët e tjera në dekadën e shkuar.
Në “St. Jakob-Park” të Bazelit, Sevilja ka mposhtur një Liverpul me dy fytyra.
Anglezët do t’i jepnin tonin pjesës së parë të finales së luajtur mbrëmjen e së mërkurës. Për çka u shpërblyen me një gol të shkëlqyer të Sturridge-t.
Gjithçka do të ndryshonte në 45 minutat e dyta. Gameiro shënon me të nisur loja. Barazimi 1-1 sjell çekuilibrimin e anglezëve, që nuk e marrin veten për asnjë çast. Coke shënon dy herë më pas, në minutën e 64-t dhe të 70-të.
Sevilja hedh valle në fushë, ndërsa liverpulasit e kanë humbur fillin. Rezultati 3-1 nuk do të ndryshonte gjer në fund të lojës, kur vërshëllima e fundit e bilbilit i bën spanjollët të nisin të festojnë. Nuk është vetëm trofeu i Ligës së Europës i fituar; skuadra ka siguruar pjesëmarrjen në Champions League sezonin tjetër.
Jurgen Klopp, trajneri gjerman i Liverpulit, e shpjegoi humbjen me brishtësinë mentale të lojtarëve të tij, me nervozitetin e me humbjen e besimit në stilin e lojës.
Por ai vetë është kthyer në një humbës finalesh, një fakt që ia mjegullon tërë karrierën e tij të
suksesshme.
Në vitin 2013 ai humbet në finalen e Champions League-s, ndërsa Bajerni i Mynihut fiton 2-1 ndaj Borusias së Dortmundit. Një vit më pas, e njëjta përballje, por këtë herë në finalen e Kupës së Gjermanisë, përfundon 2-0 në favor të Bajernit. Viti 2015 rezervon një tjetër dështim të Klopp-it në finalen e Kupës së Gjermanisë. Borusia mposhtet 1-3 nga Volfsburgu. Dhe në Angli, në këtë sezon, do të ketë një tjetër humbje. Kupa e Ligës fitohet nga Mnaçester Siti, që triumfon ndaj Liverpulit me 11-metërsha, pasi loja e rregullt kishte përfunduar 1-1.
Finalja e pestë e humbur e Klopp-it qe mbrëmë. /tesheshi.com/
