Fituese e tre sezoneve të shkuara të Ligës së Europës, Sevilja synon të luftojë për titull këtë sezon në La Liga.
Ndryshe viteve të lëna pas, në kryesimin e kampionatit spanjoll nuk është më treshja e zakonshme e dy skuadrave madrilene dhe e Barcelonës. Atletiko e Madridit ka bërë hapa prapa, ndërsa vendin ia ka zënë Sevilja. Për të mos harruar dhe paraqitjet e Vilarealit dhe Real Sociedadit, që e kanë bërë shumë më të bukur Primera Divizionin.
Sevilja fitoi thellë mbrëmë ndaj Malagës. Për më tepër, fitorja u arrit në vetëm 35 minutat e para të lojës, kur vendasit shënuan plot katër gola. Fillimisht shënoi dy herë Vietto, me rezultatin që u thellua nga golat e Ben Yedder-it dhe Vitolo-s. Malaga reagoi në pjesën e dytë, kur Sandro Ramirez realizoi golin e nderit.
Fitorja 4-1 e çoi Seviljen në kuotën e 33 pikëve, duke marrë vendin e dytë në renditje, pas Realit të Madridit. Një pozicion të cilin gjithsesi mund ta lëshojë nëse Barcelona fiton sonte ndaj Espanjolit.
Prova e vërtetë për Seviljen do të jetë më 15 janar, kur do të presë në fushën e vet Realin e Madridit. /tesheshi.com/
