Nisja e sezonit të ri parlamentar ishte, ashtu siç viti që u la pas, në mënyrën më të keqe të mundshme. Risia e mosqënies së Berishës aty, ngujuar me vendim gjykate në arrest shtëpie, gjë që kishte sjellë në Kuvend dhe disa ambasadorë perëndimorë, nuk pati asnjë efekt. Kjo pasi ai grupim opozitar i llojit berishist zgjodhi sërish reagimin kaotik, udhëhequr nga një prej figurave më pak ose aspak imponuese në politikën shqiptare, Gazmend Bardhi. Ky i fundit, në rolin e zëvëndësit të Berishës, udhëhoqi deputetët berishistë drejt bllokimit të seancës, duke pamundësuar një fjalim të Presidentit Begaj, i cili do i kushtohej sesionit të ri parlamentar. Pra, fjalimi u anollua dhe kreu i shtetit do e mbajë atë në Presidencë.
“Presidenti nuk ka ardhur në sesionet e tjera për t’ju drejtuar ligjvënësve dhe qytetarëve në seancën hapëse. Ky akt ishte një provokim i ulët i Presidentit të Republikës“, do thoshte varfërisht Bardhi papara medias.
Kësaj here, kërkesa e grupimit të Berishës ishte heqja e Gardës, por kryeparlamentarja Nikolla tha se kjo do të ndodhte nëse deputetët bllokues të foltores së Kuvendit ulen në vendin e tyre. Kjo nuk ndodhi dhe kësisoj, pati një shfaqje të vjetër në vitin e ri politik.
Protagonisti i saj, Gazmend Bardhi, një protagonist politik pa ndonjë vlerë politike në vetëvete, vijon të prodhojë lajme politike por jo politikë, aq më pak të admirueshme apo me kualitet imponues, duke kontribuuar kështu, me patalentin politik e kotësinë politike, në degradimin e pandalshëm të opozitës.
Dhe ajo çfarë ndodhte me Bardhin dhe deputetët berishistë, ndiqej qetësisht nga Basha, ulur në vendin e tij, si drejtuesi i asaj që konsderohet PD zyrtare, por gjithashtu me një paaftësi edhe të lindur për t’u faktorizuar imponueshëm, në radhë të parë përballë grupimit të Berishës e më pas ndaj vetë qeverisë.
Megjithatë, edhe ai foli para medias jashtw sallës së Kuvendit, duke thënë, pa asnjë tërheqje ligjërimore dhe krejt shabllon se “interesat e qeverisë nuk janë normaliteti politik, llogaridhënia dhe mbajtja e përgjegjësisë por vazhdimi i teatrit me skenarë dhe regji të Edi Ramës që pamundëson zërin e opozitës”. /tesheshi.com/
