Ka filluar të marrë “zë” lajmi i bujshëm se braziliani Nejmar mund të shitet tek Reali i Madridit, pas pak vitesh. Madje lajmi ka gjetur edhe “sponzorin” e parë, pikërisht tek klubi madrilen. është as më shumë e as më pak, por kapiteni i Realit, Serxho Ramos, ai që “hap krahët” për të pritur sulmuesin brazilian në skuadër.
Gjatë një prononcimi dhënë nga fusha ku është grumbulluar me kombëtaren e Spanjës, Ramos nuk i kurseu superlativat për Nejmar. “Në skuadër dua më të mirët dhe Nejmar është një prej tyre. Do të më pëlqente të vinte tek ne. është e kuptueshme që ka qenë thuajse e pamundur të vinte direkt nga Barcelona, në Madrid, por tani që luan në Francë, besoj është më e mundur dhe do të jetë i mirëpritur”- është shprehur Serxho Ramos.
E pas “thrillerit” se braziliani kaloi tek PSG, vetëm për të bërë të mundur, rishitjen tek Reali i Madridit, kanë filluar të prononcohen edhe “aktorët” e parë. Megjithatë, është ende herët për të folur, pasi sipas “skenarit”, Nejmar do të rikthehej në Spanjë, kur Kristiano Ronaldo e Lionel Mesi, do ta kenë mbyllur me futbollin e luajtur, ose do të jenë në ditët e fundit të karrierës. /tesheshi.com/
