Të gjithë rendim të ikim në Amerikë, me bindjen standarte se këtu çdo gjë është e zymtë, e atje, tej oqeanit, ndrin çdo gjë. Por nuk është kështu, së paku duke iu referuar shumë të huajve që kanë zgjedhur të jetojnë në Shqipëri, nga Italia fqinje, apo më larg akoma, pra në SHBA. TCH ka sjellë rasti e Bobit, një amerikani që ka ardhur të jetojë në Shqipëri, duke u stacionuar në Durrës. Dhe jo vetëm; së bashku me gruan dhe dy fëmijë.
“Quhem Bob dhe jam nga Amerika, Wisconsi, pranë Çikagos. Unë jam këtu që t’u mësoj nxënësve matematikë. Jam në Durrës prej 3 muajsh dhe më pëlqen të jetoj këtu”, ka deklaruar Bob.
“Zgjodha Shqipërinë pasi është një mundësi e mirë për të zbuluar Europën. Shumë persona nga vendlindja ime nuk jetojnë në Shtetet e Bashkuara dhe ishte një shans i madh për të ardhur këtu me familjen, fëmijët e mi, për të provuar si është të jesh në Europë”, shprehet Bobi, intervistuar nga TCH.
Ai, atë Durrësin apo qytete të tjera që i nxirrosim, e sheh krejt ndryshe.
“Shqipëria ka mundësi shumë të mira dhe Durrësi është një qytet shumë i bukur dhe një mundësi e mirë për këdo që vjen këtu. E kam të vështirë të flas për tregun e punës këtu, por nëse dikush nga SHBA do e kishte një mundësi pune këtu, do t’i thoja: Mos e humb atë”, ka thënë amerikani.
Numri i shtetasve të huaj që punojnë në Shqipëri ka ardhur ne rritje nga viti në vit – vlerëson TCH. /tesheshi.com/
