Beteja për vendin e tretë në kampionatin italian ngjan të jetë e fituar nga Napoli, që mbrëmjen e së dielës ka ndërprerë serinë pozitive të Lacios dhe ka fituar pastër në “Olimpico”.
Një gol nga Callejon dhe dy të tjerë nga Insigne i ka dhënë fitoren 0-3 Napolit, që tani ka shtatë pikë më tepër se Lacio e vendit të katërt.
Goli i dytë, ai i minutës së 51-të, ka qenë përcaktues, duke u dhënë fund përpjekjeve të vendasve për ta kthyer lojën në favorin e tyre. Të shmangshëm e ka quajtur këtë gol trajneri i Lacios, Simone Inzaghi.
Në fushë, në dy krahët e saj, kanë qenë dy kuqezinj, Strakosha e Hysaj, me sfidën të fituar nga ky i fundit.
Në ndeshjet e tjera të javës së 31-të të kampionatit italian, rezultati më i papritur ishte humbja 2-1 e Interit në fushën e Krotones. Një humbje e cila i zbriti interistët poshtë Milanit, që fitoi 4-0 ndaj Palermos.
Ashtu si Napoli, Roma më herët do të fitonte 0-3 në fushën e Bolonjës. Një rezultat që e konfirmon atë si ndjekësen më të afërt të Juventusit kryesues.
I vetmi barazim i së dielës do të regjistrohej në takimin Sampdoria – Fiorentina, të përfunduar 2-2. Udineze do të fitonte 3-0 ndaj Xhenovës; fitore do të kishte dhe për Torinon në transfertë, që mposhti 2-3 Kaljarin. /tesheshi.com/
