Dy skuadrat e Milanos e kanë alternuar ecurinë e tyre gjatë këtij sezoni futbollistik në Itali. Kur Interi ka qenë në formë e me rezultate të mira, Milani ka bërë të kundërtën. E kur Milani është kujtuar të fitojë, i ka ardhur radha Interit të përjetojë momente të errëta.
Kështu ka ndodhur dhe dje, në javën e njëzet e tetë të kampionatit italian. Sassuolo fitoi 2-0 ndaj Milanit në stadiumin “Citta del Tricolore”, me golat të shënuar nga Duncan dhe Sansone, nga një për çdo pjesë. Një humbje që i ndërpret vijueshmërinë pozitive ekipit të Mihajloviçit, por edhe i komprometon objektivin për vendin e tretë.
Ndryshe u paraqit Interi në mbrëmjen e së dielës, në takimin ndaj Palermos në “Giuseppe Meazza”. Ljajiç do të shënonte që në minutën e 11-të, kurse për dyfishimin e rezultatit do të mendonte Icardi, që e tund rrjetën kundërshtare 12 minuta më vonë. Miqtë përgjigjen me një gol të Vazques-it në mbyllje të pjesës së parë, por Perisiç shënon në pjesën e dytë dhe i qetëson interistët.
Fitorja 3-1 e Interit e mban atë në vend të pestë, të afruar me ekipet më sipër, ndërsa i bën gjërat akoma më të vështira për Palermon, që rrezikon shumë në fund të tabelës së klasifikimit.
Përndryshe, dje në mesditë Juventusi bëri detyrën në fushën e Atalantës, fitoi 0-2, e përsëri e ruan kryesimin me tre pikë më tepër se Napoli i vendit të dytë. /tesheshi.com/
