Forma e mirë e kolumbianit Carlos Bacca nuk ishte e mjaftueshme që Milani t’i marrë pikët e plota në udhëtimin e vështirë në “Olimpico” të Romës, duke u kënaqur me një pikë pas barazimit 1-1.
Dueli ishte mjaft i hapur, me të dyja skuadrat që i sulmuan portat rivale qysh në fillim të ndeshjes. Romanët kalojnë në epërsi pas vetëm katër minutave lojë me anë të Antonio Rudiger-it. Përkundër rasteve të tjera që pati në 45-minutëshin e parë, portat nuk u trazuan, dhe epërsia e ngushtë e të zotëve të shtëpisë mbeti në fuqi.
Milani ishte më kërkues në pjesën e dytë të lojës, dhe po ashtu e gjeti shpejt golin. Kucka barazoi shifrat në minutën e 50-të. Rastet e mëpastajme të krijuara nga Bacca nuk dhanë rezultat. Vendasve nuk u bëri punë as hyrja e Totti-t në lojë në 20-minutëshin e fundit. Kësisoj, fitorja nuk i buzëqeshi asnjërës palë, duke e zgjatur amullinë e tyre.
Ky barazim e mban Romën në vendin e pestë në renditje, me 34 pikë, kurse Milani ka 29 pikë, e renditet një pozicion më poshtë. /tesheshi.com/
