Zonja e vjetër regjistroi mbrëmë fitoren e nëntë radhazi, të siguruar ndaj një kundërshtari të vështirë si Sampdoria në stadiumin “Luigi Ferraris” të Xhenovës. Pas rrëshqitjes së Interit në shtëpi ndaj Sassuolos, kampionët në fuqi janë tashmë vetëm dy pikë larg kreut të tabelës, të cilin e mban Napoli, skuadra kampione e pjesës së parë të kampionatit italian.
Ndeshja mes Sampdorias dhe Juventusit nisi mirë për udhëtuesit, që përmes francezit Pogba e gjejnë shpejt rrugën drejt golit, në minutën e 17-të. Përkundër disa rasteve të krijuara, sikurse nga vendasit ashtu edhe nga miqtë, rrjetat nuk u prekën më në pjesën e parë.
Bardhezinjtë vazhdojnë të jenë efikasë edhe në fraksionin e dytë të lojës, duke e gjetur shpejt dhe golin e dytë, të realizuar nga Sami Khedira në minutën e 46-të. Reagimi i vendasve vjen me golin e shënuar nga Antonio Cassano, që e rihapi sërish takimin. Vendasit krijuan një varg rastesh gjer në fund të ndeshjes, mirëpo nuk arritën ta thyenin përsëri Buffon-in, portierin veteran të Juventusit, E tërë sfida përfundoi kështu 1-2 për torinezët, që vazhdojnë të kenë ngritje në lojën e tyre.
Juventus ngjitet me këtë fitore në vendin e dytë në renditjen e përgjithshme, me 39 pikë, po aq sa ka edhe Interi, që vjen menjëherë më pas. Pas javës së 19-të, vendi i parë në Serie A i takon Napolit, ndërsa Sampdoria vazhdon të qëndrojë në pozitën e 13-të. /tesheshi.com/
