Kur Napoli fitoi mbrëmë 1-7 në fushën e Bolonjës, askush nuk e mendonte se një ndeshje e tillë, me po kaq gola, do të pasonte të dielën.
Shembullin e Napolit e ndjek Lacio, që shkërmoq thuajse përfundimisht Peskarën. Një Peskarë me duart lart tani, e dorëzuar dhe në pritje të përfundimit të kampionatit që të rikthehet andej nga erdhi.
Shpresat për Peskarën duket se morën fund të mërkurën, me humbjen ndaj Fiorentinës. Pa kapitenin Memushaj, ndaj Lacios pason sot humbja 2-6. Shifrat flasin vetë: vetëm 9 pikë për Peskarën, në vend të fundit në klasifikimin e Serisë A!
Pasditja ka qenë pozitive për Arlind Ajetin, që ka bërë debutimin me Torinon. Një ndeshje që nuk ka shkuar megjithatë mirë për mbrojtësin e kombëtares shqiptare, gabimi i të cilit i ka mundësuar Empolit të barazonte 1-1.
Në mesditë, Milani ka treguar se është në krizë. Ndaj Sampdorias, 0-1 në “San Siro”; humbja e tretë radhazi. Milani nuk fiton që prej 8 janarit; që prej asaj dite ka vetëm tatëpjetë.
Në takimet e tjera, Atalanta, me portierin Berisha në portë, fitoi pastër, 2-0, ndaj Kaljarit. Xhenova humbi brenda 0-1 me Sasuolon, e Kievo barazoi pa gola me Udinezen.
Në mbrëmje, 20:45, është supersfida Juventus – Inter, paraprirë nga takimi i orës 18:00 mes Palermos dhe Krotones. /tesheshi.com/
