Napoli fiton ndeshjen ndaj Bologna dhe ngjitet sërish në vendin e parë në Seria A.
Skuadra e Sarrit ka përmbysur rezultatin që mund të ishte i komplikuar, kur “pa hapur sytë mirë”, që në minutën e parë, i nxorri në disavantazh të një goli të shënuar nga “gjyshi” Palacio. Por të kaltrit nuk e kanë humbur toruan dhe pas një presioni asfiksues, detyrojnë Mbaye të dërgojë topin në portën e tij. Pas barazimit, Napoli luan më lirshëm, me lojën e zakonshme të pasave të shpejta e me një takim. Ende pa u mbyllur pjesa e parë, vendasit fitojnë një 11-metërsh, i cili u kthye në gol nga Mertens.
Pak histori kishte edhe pjesa e dytë, ku të kaltrit gjejnë dhe golin e tretë, po me autor Mertens. Me këtë fitore, skuadra nga jugu i Italisë, ngjitet sërish 1 pikë më shumë se Juventus.
Në ndeshjet e tjera të Seria A, Inter është barazuar sërish në minutën e fundit nga Spal, duke mos dalë dot nga kriza, e duke rrëshqitur edhe më poshtë në renditjen që mund ta nxjerrë jashtë zonës Champions.
Fitore me shumë vlera arrin Verona në fushën e Fiorentinës 1-4, ndërsa bën “detyrën” Torino që i jep 3 gola Beneventos. Jashtë fushe ka fituar edhe Udineze, që triumfoi në Genoa 0-1 ndaj vendasve. /tesheshi.com/
