Motrat Williams kanë rënë në Grand Slam-in e US Open-it viktima të një teniste çeke të quajtur Karolina Pliskova.
E para do të ishte Venus që do të eliminohej në një të tetat nga 24-vjeçarja, e njëmbëdhjeta në renditjen botërore të tenisteve.
Serena do të kishte sot radhën për t’u eliminuar nga çekja që nuk kishte shkëlqyer kurrë më parë në pjesëmarrjet në Grand Slam.
Pliskova do ta mbyllte tërë lojën 2-0 ndaj Serena Williams-it, me setet të fituara 6-2 dhe 7-6.
E eliminuar ashtu si vitin e shkuar në US Open, në gjysmëfinale, Serena Williams do të dorëzojë pas këtij turneu dhe vendin e parë në renditjen botërore. Gjermanja Angelique Kerber do t’i zërë vendin, si numri një i botës në tenisin e femrave.
Williams shpresonte të thyente dhe rekordin e Steffi Graf-it, e të bëhej tenistja me më shumë turne të mëdhenj të fituar në kohën moderne, një objektiv për të cilin duhet të presë akoma.
Kundërshtarja e Pliskova-s në finalen e së shtunës të US Open-it do të jetë Kerber, që në gjysmëfinalen tjetër fitoi po 2-0 ndaj Wozniacki-t.
Fituese e Australian Open në fillim të këtij viti, Kerber arrin për herë të parë në një finale të US Open-it, ashtu si finalistja tjetër.
“Eshtë thjesht e pabesueshme. Do të thotë shumë të jesh këtu në finale për herë të parë, e të jesh numri një në botë, kjo tingëllon e mahnitshme,” do të thoshte Kerber pas gjysmëfinales.
Finalja mes Pliskova-s dhe Kerber-it do të luhet mbrëmjen e së shtunës, në 22:00. /tesheshi.com/
